Qazaqstanda stalkerler qylmystyq jazaǵa tartylýy múmkin

Foto: ashyq derekkóz

Qazaqstanda Qylmystyq kodekske «stalkıng» uǵymyn engizý talqylanyp jatyr. Bul týraly Májilis depýtaty Abzal Quspan aıtty, dep jazdy qandastar.kz

Depýtattyń sózine qulaq túrsek, «stalkıng» termınin qazaqshaǵa aýdarý qarastyrylmaǵan. О́ıtkeni bul uǵym álemdik deńgeıde keńinen qoldanylady jáne halyqaralyq tájirıbede osy ataý saqtalady.

Onyń aıtýynsha, stalkerler bastapqy kezde aıyppul tóleıdi. Al eger ol áreketin qaıtalasa, jazasy aýyr bolýy múmkin.

«Bul normanyń negizgi maqsaty – azamattardy birden sottap, túrmege otyrǵyzý emes, aýyr jáne asa aýyr qylmystardyń aldyn alý. Biz Germanııa men Kanadanyń tájirıbesin zerdeledik. Kanadada stalkıng aýyr qylmys sanatyna jatady. Biraq biz bul normany birden aýyr qylmystar qataryna qospaımyz. Ýaqyt óte kele tergeý jáne sot tájirıbesi negizinde, eger qaıtalaný jaǵdaılary jıilese, ony aýyrlatylǵan sanatqa aýystyrý máselesin qarastyrýymyz múmkin», – dedi Abzal Quspan.

Jańa norma qylmystyq teris qylyq retinde engizilýi múmkin. Ázirge «Qylmystyń qaıtalanýy nemese basqa aýyr quqyqbuzýshylyqqa ulasýy múmkin be?» degen suraq talqylanýda.