قازاقستاندا ستالكينگ ءۇشىن قىلمىستىق جاۋاپكەرشىلىك ەنگىزىلدى

فوتو: pixabay.com

قازاقستاندا العاش رەت ستالكينگ ءۇشىن قىلمىستىق جاۋاپكەرشىلىك ەنگىزىلدى, دەپ جازدى qandastar.kz

مەملەكەت باسشىسى قول قويعان زاڭعا سايكەس, وزگە ادامنىڭ ەركىنە قارسى زاڭسىز قۋدالاۋ 200 اەك-كە دەيىن ايىپپۇلمەن, 200 ساعاتقا دەيىن قوعامدىق جۇمىستارمەن نەمەسە 50 تاۋلىككە دەيىن قاماۋمەن جازالانادى. بۇل تۋرالى Stan.kzاقپارات اگەنتتىگى حابارلايدى.

باس پروكۋراتۋرانىڭ مالىمەتىنشە, ازاماتتاردىڭ جەكە باس بوستاندىعىن قورعاۋ جونىندەگى شارالاردى كۇشەيتۋ ماقساتىندا جانە «زاڭ مەن ءتارتىپ» تۇجىرىمداماسىن ىسكە اسىرۋ شەڭبەرىندە 2025 جىلعى 16 شىلدەدە مەملەكەت باسشىسى قىلمىستىق كودەكسكە 115-1 «ستالكينگ» جاڭا بابى ەنگىزىلگەن زاڭعا قول قويىلدى.

ايتا كەتەيىك, ستالكينگ – بۇل اداممەن قارىم-قاتىناس ورناتۋعا جانە (نەمەسە) ونىڭ ەركىنە قايشى كەلەتىن, زورلىق-زومبىلىقپەن ۇشتاسپاعان, ەلەۋلى زيان كەلتىرگەن ارەكەتتەردى بىلدىرەتىن ادامدى زاڭسىز قۋدالاۋ.

وتاندىق زاڭنامادا مۇنداي ارەكەتتەر ءۇشىن 200 اەك-كە (786 400 تەڭگە) دەيىن ايىپپۇل, 200 ساعاتقا دەيىن قوعامدىق جۇمىستار نەمەسە 50 تاۋلىككە دەيىن قاماۋعا الۋ تۇرىندەگى قىلمىستىق جاۋاپكەرشىلىك العاش رەت قاراستىرىلعان.

ەگەر ستالكينگ زورلىق-زومبىلىق, قورقىتۋ, بوپسالاۋ, جەكە ومىرگە قول سۇعىلماۋشىلىقتى بۇزۋمەن قاتار جۇرسە, ءىس-ارەكەتتەر قىلمىستىق كودەكستىڭ باسقا باپتارى بويىنشا قوسىمشا سارالاناتىن بولادى.

ستالكينگ بابى بويىنشا قىلمىستىق جاۋاپكەرشىلىك ناقتى زيان بولعان جاعدايدا عانا قارالادى. بۇعان جەكە ومىرگە قول سۇعىلماۋى, ەركىن ءجۇرىپ-تۇرۋعا شەكتەۋ قويۋ نەمەسە پسيحولوگيالىق قىسىم كورسەتۋ جاتادى. زاڭنىڭ ماقساتى – قۇربانداردى ەرتە كەزەڭدە قورعاۋ جانە زورلىق-زومبىلىققا توزبەۋشىلىك قالىپتاستىرۋ. قۇقىق قورعاۋ ورگاندارىنىڭ زاڭدى ارەكەتتەرى ستالكينگكە جاتپايدى.

باس پروكۋراتۋرا ازاماتتاردى ستالكينگ كورىنىستەرىنە نەمقۇرايلى قاراماۋعا جانە مۇنداي جاعدايدا دەرەۋ ىشكى ىستەر ورگاندارىنا حابارلاسۋعا شاقىرادى.

ەسكە سالايىق, بۇعان دەيىن تانىمال بلوگەر جانە اكتريسا ءاليا بايبۋسىنوۆا 5 جىلدان بەرى بەيتانىس ەر ادامنىڭ ستالكينگىنە ۇشىراپ كەلە جاتقانىن ايتىپ بەردى. ەر ادام ونى الەۋمەتتىك جەلى ارقىلى قۋدالاپ, گۇل جىبەرىپ, جەكە نومىرىنە حابارلاسىپ, ءتىپتى ۆوكزال مەن ءۇي ماڭىندا باقىلاپ جۇرگەن. بلوگەر جاس كەزىندە دە ۇقساس جاعدايلاردى باستان وتكەرگەنىن اتاپ ءوتتى. قورعانۋ ءۇشىن ول ارقاشان ساقتانۋ شارالارىن قولدانۋعا ءماجبۇر بولعان.