Jańalyqtar
Qazaqstanda stalkıng úshin qylmystyq jaýapkershilik engizildi
Foto: pixabay.com
Qazaqstanda alǵash ret stalkıng úshin qylmystyq jaýapkershilik engizildi, dep jazdy qandastar.kz
Memleket basshysy qol qoıǵan zańǵa sáıkes, ózge adamnyń erkine qarsy zańsyz qýdalaý 200 AEK-ke deıin aıyppulmen, 200 saǵatqa deıin qoǵamdyq jumystarmen nemese 50 táýlikke deıin qamaýmen jazalanady. Bul týraly Stan.kzaqparat agenttigi habarlaıdy.
Bas prokýratýranyń málimetinshe, azamattardyń jeke bas bostandyǵyn qorǵaý jónindegi sharalardy kúsheıtý maqsatynda jáne «Zań men tártip» tujyrymdamasyn iske asyrý sheńberinde 2025 jylǵy 16 shildede memleket basshysy Qylmystyq kodekske 115-1 «Stalkıng» jańa baby engizilgen zańǵa qol qoıyldy.
Aıta keteıik, stalkıng – bul adammen qarym-qatynas ornatýǵa jáne (nemese) onyń erkine qaıshy keletin, zorlyq-zombylyqpen ushtaspaǵan, eleýli zııan keltirgen áreketterdi bildiretin adamdy zańsyz qýdalaý.
Otandyq zańnamada mundaı áreketter úshin 200 AEK-ke (786 400 teńge) deıin aıyppul, 200 saǵatqa deıin qoǵamdyq jumystar nemese 50 táýlikke deıin qamaýǵa alý túrindegi qylmystyq jaýapkershilik alǵash ret qarastyrylǵan.
Eger stalkıng zorlyq-zombylyq, qorqytý, bopsalaý, jeke ómirge qol suǵylmaýshylyqty buzýmen qatar júrse, is-áreketter Qylmystyq kodekstiń basqa baptary boıynsha qosymsha saralanatyn bolady.
Stalkıng baby boıynsha qylmystyq jaýapkershilik naqty zııan bolǵan jaǵdaıda ǵana qaralady. Buǵan jeke ómirge qol suǵylmaýy, erkin júrip-turýǵa shekteý qoıý nemese psıhologııalyq qysym kórsetý jatady. Zańnyń maqsaty – qurbandardy erte kezeńde qorǵaý jáne zorlyq-zombylyqqa tózbeýshilik qalyptastyrý. Quqyq qorǵaý organdarynyń zańdy áreketteri stalkıngke jatpaıdy.
Bas prokýratýra azamattardy stalkıng kórinisterine nemquraıly qaramaýǵa jáne mundaı jaǵdaıda dereý ishki ister organdaryna habarlasýǵa shaqyrady.
Eske salaıyq, buǵan deıin tanymal bloger jáne aktrısa Álııa Baıbýsynova 5 jyldan beri beıtanys er adamnyń stalkıngine ushyrap kele jatqanyn aıtyp berdi. Er adam ony áleýmettik jeli arqyly qýdalap, gúl jiberip, jeke nómirine habarlasyp, tipti vokzal men úı mańynda baqylap júrgen. Bloger jas kezinde de uqsas jaǵdaılardy bastan ótkergenin atap ótti. Qorǵaný úshin ol árqashan saqtaný sharalaryn qoldanýǵa májbúr bolǵan.
