Qazaqstanda taǵy bir til resmı mártebege ıe bolýy múmkin

Foto: ashyq derekkóz

Qazaqstanda qazaq ymdaý tili men daktıl álipbıin – qol men saýsaqtardyń qımyly arqyly áripter men sózderdi jetkizý júıesin – ázirleý jumysy bastaldy, dep jazdy qandastar.kz

Bul týraly Stan.kz aqparat agenttigi habarlaıdy.

Bul týraly premer-mınıstrdiń orynbasary Ermek Kósherbaev depýtattyq saýalǵa bergen resmı jaýabynda málimdedi. Onyń aıtýynsha, tolyqqandy ulttyq ymdaý tilin qalyptastyrý – estý qabileti shekteýli adamdar úshin teń múmkindikterdi qamtamasyz etýdegi mańyzdy qadam bolmaq.

Qazirgi tańda elimizde resmı túrde tanylǵan qazaq ymdaý tili joq. Bul jaǵdaı estimeıtin jáne nashar estıtin azamattardyń bilimge, áleýmettik qyzmetterge jáne qoǵam ómirine tolyqqandy aralasýyna edáýir kedergi keltirip otyr.

“Qazaq ymdaý tilin ázirleý barysynda halyqaralyq tájirıbege súıenemiz. Ulybrıtanııa, Islandııa, Aýstralııa, Jańa Zelandııa, Norvegııa, Ispanııa, Shveııa jáne Ońtústik Afrıka sekildi elderde ymdaý tili resmı túrde tanylǵan jáne keńinen qoldanylady. Qazaqstannyń sheteldegi ókildikteriniń kómegimen úzdik tájirıbeler zerttelip, olar ulttyq erekshelikterimizge beıimdeletin bolady, – dedi Kósherbaev.

Joba aıasynda daktıl álipbıin ázirleý, ymdaýdyń sózdigin qurastyrý, sondaı-aq ymdaý tili aýdarmashylaryn daıarlaıtyn bilim berý baǵdarlamalaryn iske qosý kózdelip otyr. Sonymen qatar, mektepter men áleýmettik mekemelerde qoldanýǵa arnalǵan arnaıy oqýlyqtar men ádistemelik quraldar ázirlenedi.

Aıta ketsek, qazaq daktıl álipbıi alǵash ret 1998 jyly jaryq kórdi jáne ol bilim, mádenıet jáne densaýlyq saqtaý mınıstrlikteri bekitken estý qabileti buzylǵan balalarǵa arnalǵan mektepterdiń daıarlyq synyptaryna arnalǵan «Álippe» oqýlyǵynda qoldanyldy.