قازاقستاندا تاعى دا سارباز قايتىس بولدى

فوتو:قورعانىس مينيسترلىگى

اباي وبلىسى اياگوزدەگى اسكەري بولىمدە 18 جاستاعى سارباز سالامات سابيتوۆ كوز جۇمدى, دەپ حابارلادى qandastar.kz

Orda.kz باسىلىمىنىڭ اقپاراتىنشا, ول ناۋرىز ايىندا سولتۇستىك قازاقستان وبلىسىنان اسكەرگە شاقىرىلعان. اسكەر قاتارىندا نەبارى ءۇش اپتا عانا بولىپ, انت بەرىپ ۇلگەرمەگەن.

مارقۇمنىڭ تۋىستارىنىڭ ايتۋىنشا, سالاماتتى دەنساۋلىعىنا بايلانىستى اسكەرگە جىبەرمكۋى كەرەك بولعان.

«ول اسكەري قىزمەتكە جارامسىز بولاتىن. قولىمىزدا انىقتاما دا بولدى. سالاماتتىڭ ومىرتقاسى اۋىردى, كورۋ قابىلەتىندە دە ماسەلە بولدى. سوعان قاراماستان, ونى تانك بولىمشەسىنە جىبەردى. ءبىر اپتا اۋرۋحانادا جاتتى. جاعدايى ناشارلاعان سوڭ, ءبىزدى شاقىرتتى», – دەيدى مارقۇمنىڭ تۋىستارى.

قازىرگى تاڭدا اتا-اناسى اياگوزدە. الدىن الا مالىمەت بويىنشا, سالاماتتىڭ ولىمىنە مەنينگيتتەن پايدا بولعان ءىرىڭدى مي قابىنۋى سەبەپ بولعان.

قورعانىس مينيسترلىگى سالامات سابيتوۆتىڭ قازاسىن راستادى جانە كەيىنىرەك تۇسىنىكتەمە بەرەتىنىن ءمالىم ەتتى.