جاڭالىقتار
قازاقستاندا ءۇش رەت اشارشىلىق بولعان – اماندىق ءامىرحامزين
«QASQA JOL» يۋتۋب باعدارلاماسىنىڭ بۇل اپتاداعى قوناعى ولكەتانۋشى, تاريحشى اماندىق ءامىرحامزين اشارشىلىق جىلدارى قازاقستانداعى وزگە ۇلت وكىلدەرىنىڭ جاي-كۇيى قانداي بولعانىن جانە بەسسمەرتنىي پولك شەرۋىنە رۇقسات بەرگەن بيلىك اشتىق پەن قۋعىن-سۇرگىن قۇرباندارىن ەسكە الۋعا ارنالعان شەرۋلەرگە نەگە رۇقسات بەرمەگەنى جايلى ءسوز قوزعادى, دەپ حابارلايدى qandastar.kz
«قازاق تاريحىنا كوز تاستاساق, حالقىمىز ارقاشان كۇرەسۋمەن كەلە جاتىر, ءوزىنىڭ قۇقىعى, تاۋەلسىزدىگى ءۇشىن كۇرەس, اسىرەسە كەڭەس داۋىرىندەگى 70 جىلدىق حالقىمىزدىڭ ءومىر سۇرۋىنە, قالىپتى دامۋىنا ەداۋىر اسەر ەتتى. ال ەندى اشارشىلىق تۋرالى ءسوز قوزعار بولساق, 31-ءى كۇنگى داتانى ءبىز ءبولىپ قاراستىرۋىمىز كەرەك, ياعني ناقتى رەپرەسسيا قۇرباندارى, ماسەلەن 1937 جىلى رەپرەسسياعا ۇشىراعان الاشتىڭ اردا ازاماتتارى, زيالى قاۋىم وكىلدەرىن ەسكە الۋىمىز كەرەك. تولەن ابدىك ءبىر سوزىندە «رەپرەسسيا جىلدارى ءبىزدىڭ اۋىلدا قۋعىنعا ۇشىراماعان ادام قالماپتى», دەگەن بولاتىن. ياعني, رەپرەسسيا ءاربىر ەرەسەك ادامعا قاتىستى بولاتىن بولسا, اشارشىلىق ءار قازاققا تىكەلەي اسەر ەتتى. سوندىقتان مەنىڭ ويىمشا, بۇل ەكى داتانى ءبولىپ, ءبىرىن اشارشىلىق قۇرباندارىن ەسكە الۋ كۇنى رەتىندە, ال ەكىنشى داتانى رەپرەسسيا قۇرباندارىن ەسكە الۋ كۇنى رەتىندە بەلگىلەۋ كەرەك», — دەدى ول.
تاريحشى ءامىرحازيننىڭ پايىمىنشا, بۇلاي ءبولۋدىڭ سەبەبى قيىن-قىستاۋ كەزەڭدە, ەلىم-جەرىم دەپ جانىن قيعان اتا-بابا ارۋاعىنا كىشكەنە دە بولسا قۇرمەتىمىز بولار ەدى.
sn.kz جازعانداي, ول بەسسمەرتنىي پولك شەرۋىنە رۇقسات بەرگەن بيلىك اشتىق پەن قۋعىن-سۇرگىن قۇرباندارىن ەسكە الۋعا ارنالعان شەرۋلەرگە نەگە رۇقسات بەرمەگەنى تۋرالى دا ءسوز قوزعاپ ءوتتى.
«بۇل الالاۋ عوي بىلايشا ايتقاندا. سەبەبى بەسسمەرتنىي پولككە رۇقسات بەرەسىڭ دە اتامدى ەسكە الام دەپ شىعاتىن كىسىگە رۇقسات بەرمەيسىڭ. مەنىڭ ويىمشا, بۇل نونسەنس. سايكەسىنشە, مۇنداي جاعداي حالىقتىڭ باسىم كوپشىلىگىنىڭ اشۋ-ىزاسىن تۋعىزادى», — دەپ قورىتىندىلادى ولكەنتانۋشى.
