قازاقستاندا زەينەتاقى, مەملەكەتتىك قىزمەتكەرلەردىڭ جالاقىسى جانە اتاۋلى الەۋمەتتىك كومەك مولشەرى وسەدى

فوتو: سكرين ۆيدەو

قازاقستاندا زەينەتاقى, بيۋدجەت سالاسىنىڭ جالاقىسى, اتاۋلى الەۋمەتتىك كومەك (ااك) جانە تۇرعىن ءۇي كومەگىنىڭ مولشەرى ارتادى, دەپ جازادى qandastar.kz Stan.kz اقپارات اگەنتتىگىنە سىلتەمە جاساپ.

پرەمەر-ءمينيستردىڭ ورىنباسارى سەرىك جۇمانعارين سەناتتاعى Taldau Talks پودكاستىندا قوسىلعان قۇن سالىعىنىڭ ءوسۋى, ونىڭ قازاقستانداعى بيۋدجەت پەن ينفلياتسياعا اسەرىنە قاتىستى ساۋالدارعا جاۋاپ بەردى.

«زاڭ بويىنشا ءبىز ينفلياتسيا دەڭگەيىندە زەينەتاقىنى, مەملەكەتتىك قىزمەتكەرلەردىڭ, مۇعالىمدەردىڭ جانە  دارىگەرلەردىڭ جالاقىسىن وسىرۋگە تيىسپىز. 20 پايىزدىق مولشەرلەمەمەن بۇل 800 ميلليارد تەڭگە بولادى. 16 پايىزدىق مولشەرلەمەدە ول 500-550 ميللياردتىڭ اراسىندا بولادى. اتاۋلى الەۋمەتتىك كومەكتىڭ دە مولشەرىن كوبەيتەمىز. قازىر ول 200 مىڭ ادامعا 40-45 ميلليارد تەڭگە كولەمىندە. تۇرعىن ءۇي كومەگىنە قاتىستى, تاريفتەر باعاسى كوتەرىلۋىنىڭ ورنىن تولتىرۋ ءۇشىن ونىڭ دا مولشەرىن ۇلعايتامىز», – دەدى جۇمانعارين.

ايتا كەتەيىك, بۇعان دەيىن قوسىلعان قۇن سالىعىنىڭ ءوسۋى, شەكتىڭ تومەندەۋىنە قاتىستى سالىق كودەكسىنە ەنگىزىلگەن تۇزەتۋلەر ماجىلىسكە جىبەرىلگەن ەدى.