قازاقستاندا زەينەتاقى جيناعىن ەرتە شەشىپ الۋ توقتاتىلۋى مۇمكىن

«بازالىق زەينەتاقى تولەمىن باسقاشا ەسەپتەۋ تاسىلىمەن كەلىسەمىز. ءبىزدىڭ ۇسىنىس, زەينەتاقى ەڭ تومەنگى ەڭبەكاقىنىڭ 60%-ن قۇراۋى كەرەك. ەكىنشى, ول ساراپشىلاردىڭ ۇسىنىسى, ياعني زەينەتاقى قورىنان جيناقتى ەرتە شەشىپ الۋدى توقتاتۋ, ءبىز بۇنىمەن دە كەلىسەمىز. قازىر كورىپ وتىرعانىمىزداي, ەرتە شەشىپ العانداردىڭ زەينەتاقىسى 34 مىڭ تەڭگەدەن اسپايدى, سوندىقتان ونى دوعارۋ كەرەك», – دەدى سۆەتلانا جاقىپوۆا ۇكىمەت ءۇيى قابىرعاسىندا باق وكىلدەرىنىڭ ساۋالىنا جاۋاپ بەرە تۇرىپ.

ءمينيستردىڭ مالىمدەۋىنشە, 3 ترلن تەڭگەدەن استام قاراجات زەينەتاقى قورىنان ەرتە شەشىلىپ الىنعان.

«بىلاي قاراساق, 1,5 ملن ادام زەينەتاقى تولەمدەرىمەن قامتىلدى, 3 ترلن تەڭگەدەن استام قارجى زەينەتاقى قورىنان شىعارىلدى. ول قارجىعا ادامدار ءۇي جاعدايلارىن جاقسارتتى, دەنساۋلىعىن ەمدەدى. سوندىقتان بەكەر جۇمسالدى دەۋگە بولمايدى», – دەيدى ول.