Qazaqstanda jańa páterlerdiń baǵasy ósip jatyr

Foto: pixabay.com

Elimizde jańa páterlerdiń baǵasy ósip jatyr. Ásirese, Astana men Almatyda 8 paıyzǵa ósip shyǵa kelgen, dep jazdy qandastar.kz

Muny sarapshylar birinshi kezekte qurylys materıaldarynyń qymbattaýymen baılanystyrady. Bul týraly Stan.kz aqparat agenttigi KTK arnasyna silteme jasap habarlaıdy.

Jyl sońyna deıin jańa páterlerdiń quny taǵy 15-20 paıyzǵa kóterilýi múmkin deıdi mamandar.

Qazir elimizde páter qymbatshylyǵy boıynsha Almaty birinshi orynda. Munda bir bólmeli úıdiń baǵasy 20 mıllıonnan bastalady. Onyń ózi shet aýdandarda. Al ortalyqtan baspanaly bolǵysy kelgenderdiń qaltasynda 25-30 mıllıon teńgesi bolýy kerek. Onda da eski úılerdegi páter. Al, jańa turǵyn úı keshenderindegi baspana tipti qoljetimsiz. Olardyń quny jyl basynan beri 8 paıyzǵa kóterilipti.

“Teńgeniń qunsyzdanýymen baılanystyrýshy edim. Sońǵy ýaqytta teńgeniń turaqsyzdyǵy baıqalady. Bul valıýtalyq táýekelderge baılanysty qymbattap otyr deýge negiz bar. Ekinshi másele, jyl basynan bastap qosylǵan qun salyǵynyń tóńireginde aıtylyp jatqan oılar”, – deıdi ekonomıst Maqsat Halyq.

Qazir Almatyda ekonom-klastaǵy úıler ótimdi. Ásirese eki bólmeli, aýmaǵy 50-55 sharshy metrdi quraıtyn úıler. Qalada jańa páterlerdiń bir sharshy metriniń ortasha baǵasy 589 myń teńge. Jańa páterlerdiń qymbattaýy turǵyn úı naryǵyna keri áser etip úlgergen. Iaǵnı suranys edáýir azaıypty. Jyl sońyna deıin baǵa taǵy kóteriledi deıdi mamandar.

“Qazir suranys azaıýda, jańa turǵyn úı keshenderine. Jyldyń sońyna deıin, árıne, jańa turǵyn úı keshenderinde baǵa kóteriledi. Báriniń baǵasy kóterilip jatyr, materıaldardyń da baǵasyda joǵary. Jyl basynda 5-7 paıyz bolsa, taǵy da 10-15 paıyzǵa kóteriledi”, – deıdi jyljymaıtyn múlik agenttiginiń bas mamany Áıgerim Qudaıbergenova.

Astanada da páterler 15 paıyzǵa deıin qymbattapty. Biraq bul elordalyqtardyń úı alýyna tosqaýyl emes.

“Baǵa 12-15 paıyzǵa ósti. Búginde jaǵdaı turaqty, baspanaǵa suranys azaıǵan joq. Bir jáne eki bólmeli páterler árqashan suranysqa ıe. Qurylys kompanııalary turǵyn úı baǵasyn jyl basynda kótergen. Iaǵnı bul jaǵdaı jyl sońyna deıin saqtalýy kerek”, – deıdi rıeltor Nazgúl Aqylbekova.

О́ńirlerde de páter qoljetimsiz bolyp barady. Baspana baǵasy Kókshetaý men Pavlodarda aıtarlyqtaı ósipti. Al, sarapshylar úıdi qys aıaǵynda, ıaǵnı qańtar men aqpan aılarynda alǵan durys deıdi. Dál qazir ıpotekamen úı alý tıimsiz. Ekonomıster qolma-qol qarajaty bar azamattarǵa ǵana páter alýǵa keńes beredi.