قازاقستاندا جاستارعا 1 ميلليون تەڭگەدەن بەرىلەدى

25 ناۋرىز بەن 24 ءساۋىر ارالىعىندا «Zhas Project» الەۋمەتتىك جوبالار بايقاۋىنا وتىنىمدەر قابىلدانادى. جوبا شەڭبەرىندە جاستارعا 1 ميلليون تەڭگە شەڭبەرىندە 280 شاعىن گرانت بەرۋ كوزدەلگەن

قر مادەنيەت جانە اقپارات مينيسترلىگى جاستار جانە وتباسى ىستەرى كوميتەتىنىڭ توراعاسى قايرات قامباروۆتىڭ ايتۋىنشا, جوبا ەلىمىزدىڭ بارلىق 20 وڭىرىندە ىسكە اسىرىلادى. بايقاۋعا NEET ساناتىنداعى (ەكونوميكالىق, الەۋمەتتىك نەمەسە ساياسي فاكتورلارعا بايلانىستى جۇمىس ىستەمەيتىن, وقىمايتىن جاستار) 18-35 جاسقا دەيىنگى جاس قازاقستاندىقتار قاتىسا الادى.

«2022 جىلدان بەرى جاستاردى جەرگىلىكتى قوعامداستىق قىزمەتىنە قايتا تارتۋ ماقساتىندا «Zhas project» گرانتتىق باعدارلاماسى ىسكە اسىرىلىپ جاتىر. جوبا ومىرلىك ماڭىزدى داعدىلاردى دامىتۋعا جانە قوعام ومىرىنە قاتىسۋعا, جەكە تۇلعا مەن الەۋمەتتىك ينستيتۋتتار اراسىندا سەنىم ورناتۋعا, الەۋمەتتىك جوبالاردىڭ تۇراقتى ەكونوميكالىق مودەلىن قۇرۋعا باعىتتالعان. الەۋمەتتىك ماڭىزى بار بيزنەس-جوبالاردى وقىتۋ مەن ىسكە اسىرۋ ارقىلى NEET ساناتىنداعى جاستار وڭ جانە ناتيجەلى قىزمەتكە تارتۋدىڭ بىرەگەي تاجىريبەسىن الادى», – دەدى ق.قامباروۆ ورتالىق كوممۋنيكاتسيالار قىزمەتىندە وتكەن ءباسپاسوز ءماسليحاتىندا.

بايقاۋعا ۇسىنىلاتىن جوبالار جەرگىلىكتى قوعامداستىقتىڭ الەۋمەتتىك ماسەلەلەرىن شەشۋگە باعىتتالىپ, 4 ايدان اسپايتىن مەرزىمدە ىسكە اسىرىلۋى قاجەت. شاعىن گرانتتاردى ىسكە اسىرۋدا بىلىكتى جاتتىقتىرۋشىلاردى, تالىمگەرلەردى, پسيحولوگتاردى جانە الەۋمەتتىك جوبالاردى ىسكە اسىرۋ ماماندارىن تارتا وتىرىپ, جاستارعا زاڭگەرلىك جانە كونسۋلتاتسيالىق قولداۋ ۇيىمداستىرىلادى.

جوبانى ساپالى ءارى ءتيىمدى ىسكە اسىرۋ ءۇشىن ءار وڭىردە جوبالىق كەڭسە اشىلدى, كولل-ورتالىقتار قۇرىلدى, جاستار جوبالارىن قابىلداۋ ءۇشىن سايتتار اشىلدى. ازاماتتىق باستامالاردى قولداۋ ورتالىعىنىڭ cisc.kz رەسمي سايتىندا ارنايى «Zhas project» پاراقشاسىندا ءار ءوڭىردىڭ بايلانىس تەلەفوندارى كورسەتىلگەن.

2024 جىلعى 15 مامىردا ينتەرنەت-رەسۋرستار مەن الەۋمەتتىك جەلىلەردە ىرىكتەۋ ناتيجەلەرى جاريالانادى. ال قاراشا ايىندا ۇزدىك جوبالاردىڭ قاتىسۋىمەن قورىتىندى فورۋم وتەدى.