قازاقستاندا جەمقورلاردىڭ ءتىزىمى قايدا جاريالاناتىنى بەلگىلى بولدى — انتيكور وكىلى جاۋاپ بەردى

فوتو: اشىق دەرەككوز

پارا ءۇشىن سوتتالعانداردىڭ ءتىزىمى انتيكور بازاسىندا جاريالانادى. بۇل تۋرالى انتيكور وكىلى دانيار بيگايداروۆ مالىمدەدى, دەپ حابارلايدى qandastar.kz

ايتۋىنشا, بۇل جوبانىڭ پروفيلاكتيكالىق ماڭىزى زور. سەبەبى ءار ازامات بىرەۋدىڭ جىبەرگەن قاتەسىنەن ساباق الادى.

“قازىرگى ۋاقىتتا زاڭنامالىق ينيتسياتيۆا ءبىرىنشى قارالىمنان ءوتتى. اشىق ءتىزىمدى ەنگىزۋ باقىلاۋدى ارتتىرۋدىڭ ءتيىمدى قۇرالى. بۇل ءتىزىم جوبا بويىنشا انتيكور پورتالىندا جاريالانۋى ءتيىس. ەگەر زاڭ قابىلدانسا, ونىڭ پروفيلاكتيكالىق ماڭىزى زور. ويتكەنى ەلىمىزدىڭ ءاربىر ازاماتى جەمقورلىقپەن ۇستالىپ, سوتتالعان كىسىلەردى اشىق تۇردە كورە الادى. پروفيلاكتيكالىق ماڭىزى زور دەپ ايتۋىمنىڭ سەبەبى دە — وسى. بۇل باسقا ازاماتتاردىڭ وسى تىزىمگە قوسىلۋدان اۋلاق بولۋىنا اسەر ەتەدى”, — دەدى ول.

ەسكە سالايىق, بۇعان دەيىن قازاقستاندا جەمقورلاردىڭ ءتىزىمى اشىق تۇردە جاريالانۋى مۇمكىن ەكەنى ايتىلعان ەدى.

Dalanews.kz جازعانداي, سىبايلاس جەمقورلىققا قارسى ءىس-قيمىل اگەنتتىگى توراعاسىنىڭ ءبىرىنشى ورىنباسارى ۇلان سارقۇلوۆتىڭ مالىمدەۋىنشە, سىبايلاس جەمقورلىققا قارسى جاڭا زاڭ قابىلدانعان جاعدايدا, جەمقورلىق ءۇشىن سوتتالعانداردىڭ ءتىزىمى اشىق تۇردە جاريالانباق.

جاڭا ءتىزىلىم سىبايلاس جەمقورلىققا قارسى پروفيلاكتيكالىق شارا رەتىندە ەنگىزىلەدى.

تىزىلىمگە اۋىر جانە اسا اۋىر جەمقورلىق قىلمىستارى ءۇشىن سوتتالعان ادامداردىڭ ەسىمى ەنگىزىلەدى. بۇل پروتسەسس سوتتىڭ زاڭدى كۇشىنە ەنگەن ۇكىمى نەگىزىندە جۇزەگە اسىرىلادى. ەگەر ادام اقتاۋ ۇكىمىن السا نەمەسە ونىڭ سوتتىلىعى جويىلسا, ونىڭ اتى-ءجونى تىزىمنەن الىنىپ تاستالادى.

ءتىزىلىمدى سىبايلاس جەمقورلىققا قارسى ءىس-قيمىل اگەنتتىگى جۇرگىزەدى جانە ول ۆەدومستۆونىڭ رەسمي سايتىندا اشىق تۇردە قولجەتىمدى بولادى.