قازاقستاندا جەمقورلىققا قاتىستى جازا كۇشەيتىلمەك

قازاقستاندا سىبايلاس جەمقورلىق قىلمىستارى ءۇشىن جاۋاپكەرشىلىك كۇشەيتىلەدى. بۇل تۋرالى سىبايلاس جەمقورلىققا قارسى ءىس-قيمىل اگەنتتىگى توراعاسىنىڭ ءبىرىنشى ورىنباسارى ۇلان سارقۇلوۆ ءماجىلىستىڭ پلەنارلىق وتىرىسىندا مالىمدەدى, دەپ جازدى qandastar.kz

ايتۋىنشا, قازىرگى ۋاقىتتا قازاقستاندا اكىمشىلىك قۇقىق بۇزۋشىلىقتار تۋرالى كودەكستىڭ (اقبتك) 678-بابى بويىنشا زاڭدى تۇلعالار شەنەۋنىكتەرگە سىياقى بەرگەنى ءۇشىن اكىمشىلىك جاۋاپكەرشىلىككە تارتىلادى. بۇل ءۇشىن 750 اەك (2025 جىلى 2,9 ميلليون تەڭگە) مولشەرىندە ايىپپۇل قاراستىرىلعان.

«حالىقارالىق ستاندارتتاردى ەسكەرە وتىرىپ, اقبتك-ءنىڭ وسى بابىنىڭ جاڭا رەداكتسياسى ازىرلەندى. ول باپتىڭ ديسپوزيتسياسى مەن سانكتسيالارىن قىلمىستىق كودەكستىڭ 367-بابىنا («پارا بەرۋ») ۇقساس ەتىپ, بىرنەشە ەسە ايىپپۇل تۇرىندە قايتا قاراۋدى كوزدەيدى. ايىپپۇل سوماسى زاڭدى تۇلعانىڭ اتىنان نەمەسە مۇددەسى ءۇشىن بەرىلگەن ماتەريالدىق سىياقى (پارا) سوماسىنا بايلانىستى 30-دان 60 ەسەگە دەيىنگى مولشەردى قۇرايدى», – دەدى سارقۇلوۆ ءماجىلىستىڭ پلەنارلىق وتىرىسىندا.

بۇدان بولەك, زاڭ جوباسىندا قۇقىق قولدانۋ تاجىريبەسىنىڭ قورىتىندىسى بويىنشا وزگەرىستەر قاراستىرىلعان.

• ارنايى جانە قۇقىق قورعاۋ ورگاندارى قىزمەتكەرلەرىنىڭ اكىمشىلىك سىبايلاس جەمقورلىق قۇقىق بۇزۋشىلىقتار جاساعانى ءۇشىن اكىمشىلىك جاۋاپكەرشىلىگىن بەلگىلەۋ (قازىرگى ۋاقىتتا تەك تارتىپتىك جاۋاپكەرشىلىك كوزدەلگەن);
• مەملەكەتتىك قىزمەتشىلەر مەن ولارعا تەڭەستىرىلگەن تۇلعالاردىڭ كاسىپكەرلىك قىزمەتكە زاڭسىز ارالاسقانى ءۇشىن اكىمشىلىك جاۋاپكەرشىلىگىن كۇشەيتۋ;
• سىبايلاس جەمقورلىق قىلمىستار جاساعان تۇلعالاردىڭ مەملەكەتتىك قىزمەتكە 2005 جىلعا دەيىن (سىبايلاس جەمقورلاردى جۇمىسقا قابىلداۋعا زاڭنامالىق تىيىم ەنگىزىلگەنگە دەيىن) قابىلدانعان بولسا, قىزمەتتە ودان ءارى كوتەرىلۋىن شەكتەۋ.