قازاقستاندا جۇمىس ىستەيتىن زەينەت جاسىنداعى ادامدار زەينەتاقىدان قاعىلا ما: دەپۋتات اسحات ايماعامبەتوۆ ەڭبەك مينيسترىنە ەسكەرتۋ جاسادى

كوللاج: stan.kz

ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆا 1 قاراشادا جۋرناليستەرمەن بولعان كەزدەسۋدە جۇمىس ىستەيتىن زەينەت جاسىنداعى ادامدارعا زەينەتاقى تولەۋدى دوعارۋ تۋرالى ۇسىنىسقا قاتىستى تۇسىنىكتەمە بەردى. الايدا ءماجىلىس دەپۋتاتى اسحات ايماعامبەتوۆ بۇل ماسەلەگە قاتىستى قوعام دۇرلىگىپ, نارازىلىق ءبىلدىرىپ جاتقانىن ايتتى. بۇل تۋرالى qandastar.kz Stan.kz اقپارات اگەنتتىگىنە سىلتەمە جاساپ حابارلايدى.

ۆەتلانا جاقىپوۆا قازىر زەينەت جاسىنا جەتكەندەردىڭ كوپشىلىگى جۇمىس ىستەپ, زەينەتاقى مەن جالاقىنى قاتار الىپ جۇرگەنىن ايتادى.

«ولار جۇمىسىنان كەتكىسى كەلمەيدى, ويتكەنى سول وزدەرىنە ىڭعايلى, جيعان-تەرگەن ءبىلىمى, تاجىريبەسى سۇرانىسقا يە, سوندىقتان ولار جۇمىسىندا قالا بەرەدى. مۇنداي جاعدايدا بيۋدجەتتەن تولەنەتىن تولەمدەردى ولار زەينەتكە شىنداپ شىققانعا دەيىن دوعارا تۇرۋ ۇسىنىلادى», – دەيدى ول.

ونىڭ ايتۋىنشا, ۇنەمدەلگەن قاراجات 55 جاسىندا زەينەتكە شىققىسى كەلەتىندەرگە تولەۋگە باعىتتالۋى مۇمكىن.

«بۇل تەك تالقىلاۋ ساتىسىنداعى دۇنيە. وتكەن اپتادا ءبىز ساراپشىلارمەن كەزدەستىك, ەندى كەيبىرى بار سونداي ۇسىنىس تاستاعان, قىسقاسى, بۇل ازىرگە تالقىلاۋ ساتىسىنداعى نارسە. اكىمدەر دە, مينيسترلەر دە مەملەكەتتىك قىزمەتكەرلەر بار. ماسەلەن, ولاردىڭ كەلىسىمشارتى ءبىر جىلعا ۇزارتىلۋى مۇمكىن. سودان سوڭ ولار زەينەتكە شىعۋى كەرەك. مىسالى, مەنەن زەينەت جاسىنا جەتكەن سوڭ جۇمىس ىستەيسىز بە سۇرايدى. مەن جۇمىس ىستەيتىنىمدى ايتتىم. مەنىڭ عىلىممەن اينالىسۋعا نەمەسە ساباق بەرۋگە مۇمكىندىگىم بار. تيىسىنشە, مەن وسى سالالاردا جۇمىس ىستەي الامىن. ەگەر سولاي جاساسام, وندا زەينەتاقىسىز, تەك جالاقىعا ءومىر سۇرەمىن», – دەپ ءتۇسىندىردى ەڭبەك ءمينيسترى.

ونىڭ ايتۋىنشا, بۇل نورمانى قوداۋ-قولداماۋ قازاقستاندىقتاردىڭ ەنشىسىندەگى دۇنيە.

«ەگەر بارلىق ازامات… «و, بۇل جاقسى عوي. ماعان زەينەتاقىنىڭ كەرەگى جوق, ارى قاراي جۇمىس ىستەي بەرگىم كەلەدى» دەپ جاتسا عانا. ال كىم ەرتەرەك زەينەتكە شىققىسى كەلەدى? بۇل مۇگەدەك بالالاردى تاربيەلەپ وتىرعان انالار, كوپ بالالى انالار, قاۋىپتى جانە قيىن ەڭبەك جاعدايلارىندا جۇمىس ىستەيتىندەر. ولاردىڭ بىرنەشە ساناتتارى بار. سوندىقتان مۇنداي تاڭداۋ قۇقىعىن قوعامعا بەرۋ كەرەك جانە ونى قوعام ءوزى تالقىلاۋعا ءتيىس», – دەپ ءسوزىن تۇيىندەدى جاقىپوۆا.

بىراق ءماجىلىس دەپۋتاتى اسحات ايماعامبەتوۆجۇمىس ىستەپ جۇرگەن زەينەتكەرلەردى مەملەكەتتىك بيۋدجەت ەسەبىنەن زەينەتاقىسىنان ايىرۋ تۋرالى ۇسىنىس قوعامدا الاڭداۋشىلىق تۋعىزعانىن ايتادى.

«بۇل يدەيا مەملەكەتتىك شىعىنداردى حالىقتىڭ ەڭ وسال توپتارىنىڭ ءبىرى ەسەبىنەن شەشۋگە تىرىسۋ سەكىلدى كورىنەدى. مۇنىڭ ورنىنا بيۋدجەتى وڭتايلاندىرۋدىڭ ءادىل ادىستەرىن ىزدەستىرۋ كەرەك. كوپتەگەن زەينەتكەردىڭ ازىرشە مينيمالدى تولەمدەر الاتىنىن جانە ولار ءومىر ءسۇرۋ ءۇشىن جەتكىلىكسىز ەكەنىن ءتۇسىنۋ ماڭىزدى. ەندى ولاردىڭ الىپ جۇرگەن قاراپايىم تابىسى, الەۋمەتتىك قامتاماسىز ەتۋ قۇقىعى تۋرالى كونستيتۋتسيانىڭ 28-بابىمەن كەپىلدەندىرىلگەن زاڭ كوڭىلگە كۇدىك ۇيالاتتى. ادامداردىڭ ەڭ از قارسىلىق بىلدىرۋگە قابىلەتتى جەرىنەن ۇنەمدەۋ جولدارىن ىزدەپ جاتقانداي اسەر قالدىرادى. العاشىندا ونكولوگيالىق ناۋقاستاردىڭ ەمدەۋ قارجىسىن قىسقارتۋ ۇسىنىستارى, كەيىن حوسپيستار مەن اۋىر ناۋقاستاردى قولداۋعا باعىتتالعان قارجىنى قىسقارتۋ, ال ەندى – جۇمىس ىستەپ جۇرگەن زەينەتكەرلەردىڭ زەينەتاقىسىن قىسقارتۋ تۋرالى ۇسىنىس جاسالدى«, – دەپ اشۋلاندى ءماجىلىس دەپۋتاتى.

بيۋدجەتتى ۇنەمدەۋ كەرەك, بىراق ءبىلىم بەرۋ, دەنساۋلىق ساقتاۋ, زەينەتاقىلار, جاردەماقىلار مەن ازاماتتارىمىزدىڭ جالاقىلارىن قول سۇعۋعا بولمايدى دەدى دەپۋتات.

“فورۋمدار, مەرەكەلىك بەزەندىرۋلەر, جاڭا اكىمشىلىك عيماراتتاردى سالۋ, ماعىناسىز ۇلكەن ستاديونداردىڭ قۇرىلىسى, شەتەلدىك لەگيونەرلەرگە جالاقى تولەۋ جانە وسىنداي باسقا باعىتتار تاپشىلىقتى جابۋعا مۇمكىندىك بەرەر ەدى. قۋانىشقا وراي, ەڭبەك جانە حالىقتى الەۋمەتتىك قورعاۋ مينيسترلىگى مۇلدەم مۇنداي باستامالاردىڭ جوق ەكەنىن ءتۇسىندىردى. زاڭنامادا وزگەرىستەر ەنگىزىلمەيدى. ولاردىڭ ايتۋىنشا, بۇل تەك تالقىلاۋعا ۇسىنىلعان پىكىر عانا, مينيسترلىكتىڭ الداعى ۋاقىتقا جوسپارى ەمەس. دەگەنمەن, مەنىڭ ويىمشا, بۇل يدەيانىڭ ءوزى كونستيتۋتسيالىق جانە ادىلدىك پرينتسيپتەرىنە قايشى كەلەدى», – دەپ جازدى دەپۋتات.

ول ازاماتتاردا الاڭداۋشىلىق تۋعىزۋعا نەگىز بولماۋى كەرەك دەپ وتىر.

«سوندىقتان ارىپتەستەرىمنىڭ قوعامدا تۇسىنىسپەۋشىلىك پەن ارتىق الاڭداۋشىلىقتى بولدىرماۋ ءۇشىن مۇنداي تەرەڭ ماسەلەلەر بويىنشا ويلانىپ بارىپ, سويلەۋىن قالايمىن«, – دەپ قورىتىندىلادى دەپۋتات.

ەسكە سالايىق, بۇعان دەيىن جەلىدە 1 قاڭتاردان باستاپ زەينەتاقىعا 45 مىڭ تەڭگە قوسىمشا تولەم ەنگىزىلەتىنى تۋرالى اقپارات تارادى. ەڭبەك جانە حالىقتى الەۋمەتتىك قورعاۋ مينيسترلىگى الەۋمەتتىك جەلىدە تاراتىلىپ جاتقان بۇل اقپاراتتى جوققا شىعاردى.