جاڭالىقتار
قازاقستانداعى پانسيوناتتا زەينەتكەرلەردى كيىمسىز اۋلادا ۇستاعان
فوتو: gov.kz
اقسۋ قالاسىنىڭ پروكۋراتۋراسى قاداعالاۋ قىزمەتىن جۇزەگە اسىرۋ بارىسىندا جەرگىلىكتى بيۋدجەتتەن قارجىلاندىرىلاتىن پانسيوناتتاردىڭ بىرىندە قارتتارعا قاتىگەزدىك كورسەتۋ فاكتىلەرىن انىقتادى, دەپ جازدى qandastar.kz
باس پروكۋراتۋرانىڭ اقپاراتىنشا, مەكەمەدە تۇسىرىلگەن بەينەجازبالاردى زەرتتەۋ بارىسىندا قورقىنىشتى فاكتىلەر اشىلدى: پانسيونات قىزمەتكەرلەرى تۇراقتى ەكى دارمەنسىزدى ۇزاق ۋاقىت بويى قورلاپ, زورلىق-زومبىلىق كورسەتكەن.
«جابىرلەنۋشىلەردىڭ ءبىرىنىڭ جاسى — 84-تە.
ولاردى ۇنەمى ۇرىپ-سوعىپ, قولدارىن بۇراپ, قىستىڭ سۋىعىندا سىرت كيىمسىز اۋلادا ۇستاعان.
وسى فاكتى بويىنشا اقسۋ قالاسىنىڭ پروكۋراتۋراسى قر قك 110-بابىنىڭ 2-بولىگى بويىنشا سوتقا دەيىنگى تەرگەپ-تەكسەرۋدى باستادى.
قازىرگى ۋاقىتتا بارلىق كىنالى ادامدار انىقتالدى», – دەلىنگەن حابارلامادا.
