جاڭالىقتار
قازاقستانداعى رەيتينگى جوعارى ۋنيۆەرسيتەتتەر ءتىزىمىن بەلگىلى بولدى
عىلىم جانە جوعارى ءبىلىم مينيسترلىگى رەيتينگى جوعارى قازاقستاندىق جوعارى وقۋ ورىندارىنىڭ ءتىزىمىن جاريالادى, دەپ حابارلايدى qandastar.kz.
2024 جىلى 5 ماۋسىمدا QS Quacquarelli Symonds جوعارى ءبىلىم سالاسىنداعى حالىقارالىق تالداۋ اگەنتتىگى الەمنىڭ ۇزدىك ۋنيۆەرسيتەتتەرى رەيتينگىنىڭ 2025 جىلعى جاڭا شىعارىلىمىن – QS World University Rankings-2025 شىعاردى.
“قازاقستان رەيتينگتە 21 جوعارى وقۋ ورنى ۇسىنىلعان. ونىڭ بەسەۋى جاقسارىپ, تورتەۋى ءوز پوزيتسيالارىن ساقتاپ, 12-ءسى تومەندەدى. ءال-فارابي اتىنداعى قازاق ۇلتتىق ۋنيۆەرسيتەتى قازاقستاندىق جوعارى وقۋ ورىندارى اراسىندا كوشباسشى بولىپ قالا بەرەدى. اتالعان ۋنيۆەرسيتەت 163-ورىنعا يە بولىپ, الەمنىڭ ۇزدىك 200 جوعارى وقۋ ورنى قاتارىنا قوسىلدى. بۇل وتكەن جىلعى ناتيجەدەن 67 پوزيتسياعا جاقسى. سونداي-اق ل.گۋميلەۆ اتىنداعى ەۋرازيا ۇلتتىق ۋنيۆەرسيتەتى (355-ورىننان 321-ورىنعا) جانە ساتباەۆ ۋنيۆەرسيتەتىنىڭ (481-ورىننان 405-ورىنعا) كورسەتكىشتەرى جاقساردى”, – دەلىنگەن حابارلامادا.
سونىمەن قاتار قازاقستان رەيتينگتە بەدەل كورسەتكىشتەرىنىڭ – اكادەميالىق بەدەلدىڭ جانە جۇمىس بەرۋشىلەر اراسىنداعى بەدەلدىڭ ايتارلىقتاي جاقسارعانىن اتاپ ءوتتى.
«ورتالىق ازيانىڭ باسقا ەلدەرىمەن سالىستىرعاندا قازاقستان «جۇمىس بەرۋشىلەر اراسىنداعى بەدەل» ينديكاتورى بويىنشا جاقسى ناتيجەلەرگە قول جەتكىزدى. بۇعان ورتالىق ازيا ايماعىنىڭ ءاربىر ەلىندەگى رەيتينگكە قاتىسۋشى بارلىق جوعارى وقۋ ورىندارى ءۇشىن وسى كورسەتكىش بويىنشا ەسەپتەلگەن ورتاشا ماندەر دالەل بولا الادى”, – دەلىنگەن حابارلامادا.
رەيتينگكە قاتىسقان 21 قازاقستاندىق جوو-نىڭ 19-ى «اكادەميالىق بەدەلى» جانە «جۇمىس بەرۋشىلەر اراسىنداعى بەدەلى» كورسەتكىشتەرىن جاقسارتتى.
ءال-فارابي اتىنداعى قازاق ۇلتتىق ۋنيۆەرسيتەتى مەن گۋميلەۆ اتىنداعى ەۋرازيا ۇلتتىق ۋنيۆەرسيتەتى ەڭ جاقسى ناتيجە كورسەتتى. سولاردىڭ ىشىندە «جۇمىس بەرۋشىلەر اراسىنداعى بەدەلى» بويىنشا قازۇۋ الەمدە 77-ورىندا.
