جاڭالىقتار
قازاقستاندىق ايەلگە ۇيلەنگەن شەتەلدىك ۇشقىش ءسابيىن ولتىرگەنى ءۇشىن 20 جىلعا سوتتالدى: ول ەكس-ايەلى وعان جالا جاپتى دەپ مالىمدەدى
فوتو: The Sun
بريتاندىق ۇشقىش بالاسىن ولتىرگەنى ءۇشىن قازاقستان تۇرمەسىندە جازاسىن وتەپ جاتىر. الايدا بۇرىنعى ايەلى ءسابيدى ءوزى ولتىرگەنىن «مويىنداعاننان» كەيىن بوستاندىققا شىعۋى مۇمكىن, دەپ جازدى qandastar.kz
بۇل تۋرالى Stan.kz اقپارات اگەنتتىگى The Sun باسىلىمىنا سىلتەمە جاساپ حابارلايدى.
گونكونگ اۋە كومپانياسىنىڭ كوممەرتسيالىق ۇشقىشى قازاقستاندىق قىزعا ۇيلەنىپ, ەكەۋى بالالى بولدى.
46 جاستاعى موحامەد باراكات 20 جىلعا باس بوستاندىعىنان ايىرىلدى, بىراق ول كىناسىن مويىنداماي كەلدى. ەندى ونىڭ 28 جاستاعى بۇرىنعى ايەلى مادينا ابدۋللاەۆا قىزى سوفيانىڭ ولىمىنە ءوزى كىنالى ەكەنىن مويىنداعان اۋديوجازبا پايدا بولدى.
باراكات 2020 جىلى ماس جانە ەسىرتكى كۇيدە قوناقۇيدە بولعان جانجال كەزىندە ءسابيىن قابىرعاعا ۇرىپ, باس سۇيەگىن جارىپ ءولتىردى دەگەن ايىپپەن سوتتالعان. مادينا سوت پروتسەسىندە نەگىزگى كۋاگەر بولدى.
باس پروكۋراتۋرا ۇشقىشتىڭ بۇرىنعى ايەلى بالانى ولتىرگەنىن مويىنداعاننان كەيىن ىستى قايتا تەرگەۋدى باستادى. ارنايى ۆيدەو-فونوسكوپيالىق ساراپتاما داۋىس ماديناعا تيەسىلى ەكەنىن راستادى. ساراپتاما اۋديو وزگەرتىلمەگەنىن انىقتادى. ۇشقىش بۇل جازبانى تۇرمەدە وتىرىپ ءوزى جازىپ العان.
«مەن ونى ءولتىردىم…» دەيدى مادينا اۋديودا
«سەن ەكەنىڭدى بىلەمىن» دەدى موحامەد. ول 2019 جىلعى 24 قازاندا بالانى ايەل ابايسىزدا ءولتىرىپ, كىنانى ەر ادامعا جاپقانىن ايتقان.
اۋديودا مادينا الماتىداعى قوناقۇيدە سوفيانىڭ موينىن قالاي سىندىرىپ العانىن ايتىپ بەرگەن.
«مەن كەتىپ قالعان ەدىم… قايتىپ كەلسەم, ول وياۋ, اش بولعاندىقتان جىلاپ جاتىر. ونى تاماقتاندىرا باستادىم. سوسىن ول ۇلكەن دارەتكە وتىردى… مەن ونى جۋعا تىرىستىم. جۋىپ جاتقاندا موينىن سىندىرىپ الدىم…», – دەدى ايەل.
سونداي-اق ول موحامەدتەن تاعى ءبىر بالا تۋعىسى كەلەتىنىن ايتقان.
«ەكى كۇن بۇرىن ءبىز تاعى دا ۇرىستىق. مەن وعان نە بولعانىن ايتپايىنشا, ونىمەن تاعى بالالى بولعىم كەلمەيتىنىن ايتتىم. مىنە, كورىپ تۇرسىڭدار, ول “ماعان حابارلاسشى” دەپ جازدى. سوسىن “مەن ونى ءولتىردىم” دەپ جازدى», – دەدى ەر ادام.
مادينا ودان كەشىرىم سۇراعان.
الايدا سوت وتىرىستارىندا ەر ادام مادينانى ۇرىپ-سوعىپ, ارتىنشا قىزىن ءولتىرىپ العانى ايتىلدى. دەگەنمەن The Sun باسىلىمى مادينانىڭ جاراقات العانىن دالەلدەيتىن ايعاق بولماعانىن, قىز ەر ادام قوناقۇيدەن شىعىپ كەتكەننەن كەيىن مەرت بولعانىن جازادى..
ەر ادام كەتكەن سوڭ ايەل ەسىكتى اشىپ, قيمىلسىز جاتقان قىزدى كوتەرىپ, قوناقۇي سىرتىنا جۇگىرىپ بارعان. ول بەينەباقىلاۋ كامەرالارىنا ءتۇسىپ قالدى.
قوناقۇي قىزمەتكەرلەرىنىڭ ايتۋىنشا, مادينا «ول مەنىڭ بالامدى ءولتىردى, ونى ۇردى» دەپ ايقايلاعان.
قىزمەتكەرلەر ءسابيدىڭ كوگەرىپ كەتكەنىن ايتتى. ولار بۇعان دەيىن كىشكەنتاي قىز قوناقۇيدە ء«اردايىم ك ۇلىپ جۇرەتىن» دەپ سيپاتتاعان.
سول ساتتە ايەل بىرنەشە رەت ەسىنەن تانىپ قالعان, بۇل كەزدە قىزمەتكەرلەر دارىگەرلەردى شاقىرىپ, بالانىڭ ولگەنىن انىقتاعان.
2021 جىلى ءۇش سۋديا اپەللياتسيالىق شاعىمدى قاناعاتتاندىرماي, «كىنا قوناقۇي تازالىقشىسىنىڭ سوزىمەن دالەلدەندى» دەدى. تازالىقشى قابىرعادان سوققى دىبىستارىن ەستىگەنىن, ودان كەيىن بىردەن بالانىڭ جىلاۋى باسىلعانىن ايتقان.
سوت سوفيانىڭ «بىرنەشە مارتە جاسالعان سوققىلاردان» ولگەنىن, ياعني باراكاتتىڭ بالانىڭ باسىن بىرنەشە رەت قابىرعاعا نەمەسە ەسىككە ۇرعانىن, ميىن زاقىمداعانىن ايتتى.
سۋديا ونى ماس جانە ەسىرتكى قولدانعان دەپ تانىدى, بىراق قۇجاتتارعا سايكەس ونىڭ قانىندا نەمەسە زارىندە ەسىرتكى تابىلماعان كورىنەدى. ەسىرتكى قولدانعانىن راستايتىن جالعىز دالەل — قوناقۇيدەگى ماتراستان تابىلعان قۇسىقتان انىقتالعان ەسىرتكى ءىزى بولدى.
ەر ادامنىڭ ادۆوكاتى ءدىن-مۇحاممەد نارىمبەتوۆ بەينەباقىلاۋ كامەرالارىن كورسەتىپ, ەر ادامنىڭ ماس ەمەس ەكەنىن, ياعني سابىرلى تۇردە كەلە جاتقانىن كورسەتىپتى.
موحامەد مادينا وعان جالا جاپتى دەپ وتىر.
