الەم جاڭالىقتارى
قازاقستاندىق ارۋ انتاركتيدانى ءجۇزىپ ءوتتى
فوتو: مينيسترلىك
انەل سىتدىقوۆا تمد مەملەكەتتەرى اراسىندا العاش بولىپ انتاركتيدانىڭ مۇزداي سۋى ارقىلى ءجۇزىپ ءوتتى, دەپ qandastar.kz اقپارات پورتالى Sportministri Instagram پاراقشاسىنا سىلتەمە جاساپ حابارلايدى.
ول 750 مەتر قاشىقتىقتى 18.58.95 مينۋتتا باعىندىرعان. بۇل ۋاقىتتا سۋدىڭ تەمپەراتۋراسى -1,4 گرادۋستى كورسەتكەن.
ونىڭ ايتۋىنشا, انتاركتيدادا بولعان ون كۇننىڭ ىشىندە ءجۇزۋ ءۇشىن قولايلى ءساتتى كۇتكەن. ونىڭ ۇستىنە كەمەدە باسقا 150 جولاۋشى بولعاندىقتان, كورابل ءتارتىبىن دە ساقتاۋ كەرەك ەدى.
«انتاركتيدانىڭ سۋلارىن ءجۇزىپ وتتىك. مەن ءۇشىن بۇل وتە سالقىن بولدى. سۋدىڭ سالقىندىعى -1,4 گرادۋس بولسا, جەلدىڭ جىلدامدىعى ساعاتىنا 35 شاقىرىم ەدى. ايسبەرگتەر مەن پينگۆيندەر اراسىندا ءجۇزۋدىڭ اسەرى بولەك. انتاركتيدا مۇزداي قۇشاعىن اشقان از عانا ادامنىڭ قاتارىندا بولۋ مەن ءۇشىن ەرەكشە وقيعا بولدى», — دەيدى ءا.سىتدىقوۆا.
