قازاقستاندىق اسكەري قىزمەتكە شاقىرۋ جاسىنا داۋ ايتپاق بولىپ, سوتقا جۇگىندى

تاراتىلعان اقپاراتقا سۇيەنسەك, ءوتىنىش بەرۋشى قاعيدالاردا كورسەتىلگەن مەديتسينالىق قايتا كۋالاندىرۋ ءۇشىن بەلگىلەنگەن جاس شەكتەلىمى (27 جاس) ونىڭ ەڭبەك بوستاندىعىنا, قىزمەت ءتۇرىن جانە ماماندىعىن ەركىن تاڭداۋ قۇقىعىنا نۇقسان كەلتىرەتىنىن ايتادى, بۇل قۇقىقتار قازاقستان رەسپۋبليكاسىنىڭ كونستيتۋتسياسىنىڭ 24-بابىندا بەكىتىلگەن.

كونستيتۋتسيالىق سوت جاس شەگىنىڭ قازاقستان رەسپۋبليكاسى زاڭىنىڭ 31-بابىمەن سايكەس كەلەتىنىن اتاپ ءوتتى, وندا «ون سەگىز جاستان جيىرما جەتى جاسقا دەيىنگى, اسكەرگە شاقىرۋدى كەيىنگە قالدىرۋعا نەمەسە اسكەرگە شاقىرىلۋدان بوساتىلۋعا قۇقىعى جوق ازاماتتار قازاقستان رەسپۋبليكاسىنىڭ قارۋلى كۇشتەرىن, باسقا دا əسكەرلەر مەن əسكەري قۇرالىمداردى جاساقتاۋ ءۇشىن قاجەتتى سانىندا مەرزiمدi اسكەري قىزمەتكە شاقىرىلۋعا جاتادى».

zakon.kz جازعانداي, ءوتىنىش مازمۇنىنان جانە وعان قوسا بەرىلگەن قۇجاتتاردان ءوتىنىش سۋبەكتىسىنىڭ, ونىڭ جاسى ەسكەرىلە وتىرىپ, مەرزىمدى اسكەري قىزمەتكە شاقىرىلۋعا جاتاتىن ازاماتتار ساناتىنا جاتپايتىنى كەلىپ شىعادى.

«وسىعان بايلانىستى ءوتىنىش بەرۋشى داۋلاپ وتىرعان قاعيدالار نورماسى ونىڭ قۇقىقتارى مەن بوستاندىقتارىن تىكەلەي قوزعامايدى»,- دەلىنگەن اقپاراتتا.

الدىن الا قاراۋ قورىتىندىسى بويىنشا كونستيتۋتسيالىق سوت ءوتىنىشتى كونستيتۋتسيالىق ءىس جۇرگىزۋگە قابىلداۋدان باس تارتتى.