Jańalyqtar
Qazaqstandyq áskerıler Máskeýdegi paradqa qatysady
Qorǵanys mınıstrligi qazaqstandyq áskerı qyzmetkerler Máskeýde Jeńistiń 80 jyldyǵyna arnalǵan áskerı paradqa qatysatynyn málimdedi. Bul týraly qandastar.kz saıty Stan.kz aqparat agenttigine silteme jasap habarlady.
Málimetterge sensek, Máskeýdegi Qyzyl alańda ótetin paradta Qazaqstannyń 37-desanttyq-shabýyldaýshy brıgadasynyń Panfılov atyndaǵy saltanatty toby sap túzep ótpek. Áskerıler Reseıge kelip te úlgerdi. Olar Volokolamsk qalasyndaǵy panfılovshylar mýzeıine baryp, Nelıdovo aýylyndaǵy baýyrlastar zıratyna jerlengen jaýyngerler rýhyna taǵzym etti.
Merekelik sharaǵa prezıdent Qasym-Jomart Toqaev ta qatysady. Buǵan deıin memleket basshysy elimizde Jeńis kúnine arnalǵan sharalar 7 jáne 8 mamyr kúnderi ótetinin, sodan keıin Máskeýge baratynyn aıtqan edi.
«Ishki sharalar aıaqtalǵannan keıin men Máskeýge jumys saparymen baramyn», – dedi Toqaev.
Sonymen qatar paradqa Qyrǵyzstan, О́zbekstan, Tájikstan jáne Túrikmenstan basshylary da qatysady. 2023 jáne 2024 jyldary da Qasym-Jomart Toqaev Máskeýdegi paradtarǵa barǵan edi.
