قازاقستاندىق ازامات ءوزىن ۇستاي الماي قىتايلىق باستىعىن ۇرىپ تاستاعان

فوتو: جاساندى ينتەللەكت جاساعان

جامبىل وبلىسىنىڭ مويىنقۇم اۋدانىندا زاۋىت جۇمىسشىسى ءوز باستىعى قىتاي ازاماتىن ۇرعانى ءۇشىن سوتتالدى, دەپ جازدى qandastar.kz

بۇل تۋرالى Stan.kz اقپارات اگەنتتىگى حابارلايدى.

وقيعا 2025 جىلدىڭ ماۋسىم ايىندا بولعان. بۇل تۋرالى اۋداندىق سوتتىڭ ءباسپاسوز قىزمەتى حابارلادى.

ءىس ماتەريالدارىندا كورسەتىلگەندەي, ەر ادام باستىعىنا جۇمىس ۋاقىتىنىڭ تابەلىن قول قويۋ ءۇشىن جاقىنداعان. الايدا باستىعى قول قويۋدان باس تارتىپ, ەكەۋىنىڭ اراسىندا داۋ تۋىنداعان. سول ساتتە جۇمىسشى اشۋلانىپ, باستىعىن بىرنەشە رەت جۇدىرىقپەن بەتىنەن جانە دەنەسىنەن ۇرعان.

باستىق جاراقات الىپ, سوتقا جۇگىندى. جۇمىسشىعا «دەنە جاراقاتىن سالۋ» بابى بويىنشا ايىپ تاعىلدى. ول كىناسىن مويىنداپ, كەشىرىم سۇرادى جانە قاتاڭ جازالاماۋدى ءوتىندى.

الايدا باسشىسى كەشىرىم بەرمەي, مورالدىق زيان مەن سوت شىعىندارى ءۇشىن 1 ميلليون تەڭگە تالاپ ەتتى.

“سوت ايىپتالۋشىنىڭ كىناسىن مويىنداعانىن جانە وكىنىش بىلدىرگەنىن ەسكەرىپ, وعان 157 280 تەڭگە (ياعني 40 ايلىق ەسەپتىك كورسەتكىش) ايىپپۇل سالدى. سونداي-اق, سوت باستىعىنىڭ تالابىن جارتىلاي قاناعاتتاندىرىپ, جۇمىسشىنى 500 مىڭ تەڭگە كولەمىندە وتەماقى تولەۋگە مىندەتتەدى”, – دەلىنگەن حابارلامادا.

ۇكىم ءالى زاڭدى كۇشىنە ەنگەن جوق.