قازاقستاندىق بانكتەر 21 جاسقا تولماعان ازاماتتارعا كارتا بەرمەيدى

فوتو:يگور ەگوروۆ

ەلىمىزدە بانكتەر 21 جاسقا تولماعان ازاماتتارعا ونلاين كارتا بەرۋدى توقتاتۋى مۇمكىن, دەپ حابارلايدى qandastar.kz

قارجى نارىعىن رەتتەۋ جانە دامىتۋ اگەنتتىگى دروپپەرلىك, ەسىرتكى اينالىمى, قارجى پيراميدالارى مەن ونلاين كازينونىڭ قىزمەتىنە شەكتەۋ قويۋ ماقساتىندا ۇكىمەتكە وسىنداي ۇسىنىس تاستادى.

جوبا ماقۇلدانسا, قازاقستاندىقتاردىڭ ماركەتپلەيستەردە جانە وزگە دە ينتەرنەت سايتتاردا 500 مىڭ تەڭگەدەن ارتىق سوماعا جاساعان ساۋداسى, شەتەلدىك اقشا اۋدارىمدارى قاتاڭ باقىلاۋعا الىنادى. بۇل تۋرالى بانكتەر قۇزىرلى ورگاندارعا حابارلاۋعا مىندەتتەلەدى.

بۇدان بولەك, ءار ازامات ءوز اتىنا تىركەلگەن تەك ءبىر عانا بايلانىس ءنومىرىن بانكتىك كارتاسىنا تىركەي الادى. ال 18 بەن 21 جاس ارالىعىنداعى كليەنتتەرگە قازىرگىدەي قاشىقتان نەمەسە وكىل ارقىلى تولەم كارتاسىن قايتا شىعارۋعا تىيىم سالىنادى. بانككە مىندەتتى تۇردە وزدەرى كەلۋگە ءتيىس.

«الاياقتار جاستارعا ونلاين اقشا تابۋعا ۋادە بەرىپ, ولاردىڭ بانكتىك دەرەكتەمەلەرىن ۇرلايدى نەمەسە ولاردى الداپ, دروپپەرلىككە تارتا وتىرىپ, شوتتارىنان زاڭسىز تولەمدەر مەن اۋدارىمدار جاساۋعا يتەرمەلەيدى. سونىمەن قاتار بانكتەر كليەنتكە بىرنەشە تولەم كارتوچكاسىن شىعارعان كەزدە شوت بويىنشا اقشا قوزعالىسىنىڭ كارتوچكانى شىعارۋ ماقساتىنا سايكەس كەلۋىن مونيتورينگتەيتىن بولادى. الاياقتاردىڭ قاسكۇنەمدىك ىقپالىنان جانە الداۋدان قورعاۋ ماقساتىندا 14-18 جاس ارالىعىنداعى جاستاردىڭ وپەراتسيالارىن اتا-اناسى نەمەسە وزگە دە قامقورشىلارى مىندەتتى تۇردە تەكسەرۋىن ەنگىزۋ ۇسىنىلادى», — دەيدى قارجى نارىعىن رەتتەۋ جانە دامىتۋ اگەنتتىگى باسقارماسىنىڭ باسشىسى ەرلان سارسەنبەك ۇلى.

قارجى نارىعىن رەتتەۋ جانە دامىتۋ اگەنتتىگى قازاقستاندا بانك قىزمەتتەرىن ۇسىنۋ ەرەجەلەرىن قاتاڭداتۋدى كوزدەيتىن قاۋلى جوباسىن جاريالادى. ماقسات — كليەنتتەردى الاياقتىقتان قورعاۋ, اقشا جىمقىرۋ مەن تەرروريزمدى قارجىلاندىرۋعا (اج/تق) قارسى كۇرەستى كۇشەيتۋ.

ونلاين-بانكينگ — تەك 21 جاستان باستاپ

قۇجاتقا سايكەس, 18 بەن 21 جاس ارالىعىنداعى قازاقستاندىقتارعا ونلاين رەجيمدە تولەم كارتالارىن اشۋعا جانە قايتا شىعارۋعا تىيىم سالىنادى. ەندى بۇل قىزمەت تەك بانكتىڭ بولىمشەسىنە جەكە كەلۋ ارقىلى عانا قولجەتىمدى بولادى. سونىمەن قاتار, بانكتەرگە وسى جاس ساناتىنداعى ازاماتتارمەن قاشىقتان ىسكەرلىك قارىم-قاتىناس ورناتۋعا تىيىم سالىنادى.

14 پەن 18 جاس ارالىعىنداعى جاسوسپىرىمدەرگە قوسىمشا تالاپ ەنگىزىلەدى: ونلاين رەجيمدە بانك قىزمەتتەرىن العان كەزدە بارلىق وپەراتسيالار اتا-انالارىنىڭ نەمەسە زاڭدى وكىلدەرىنىڭ كەلىسىمىمەن عانا جۇزەگە اسىرىلۋى ءتيىس.

بارلىق بانكتەرگە ارنالعان جاڭا ەرەجەلەر

بانكتەرگە مىنا مىندەتتەر جۇكتەلەدى:

● كليەنتتەردىڭ بيومەتريالىق دەرەكتەرىن (فوتو, ۆيدەو) ىنتىماقتاستىق اياقتالعاننان كەيىن كەمىندە بەس جىل ساقتاۋ;

● وپەراتسيالاردى تالداۋ, الاياقتىقتى انىقتاۋ جانە قارجى پيراميدالارىنىڭ بەلگىلەرىن باقىلاۋ ءۇشىن جاساندى ينتەللەكت پەن ماشينالىق وقىتۋ الگوريتمدەرىن پايدالانۋ;

● كليەنتتەرمەن قاشىقتان ءوزارا ارەكەتتەسكەندە ەكى فاكتورلى جانە بيومەتريالىق سايكەستەندىرۋدى قولدانۋ;

● بارلىق كارتالار مەن شوتتاردى ءموبيلدى ازاماتتار بازاسىندا تىركەلگەن ءبىر تەلەفون نومىرىنە بەكىتۋدى قامتاماسىز ەتۋ;

● كرەديتتىك تىركەۋگە ۇقساس بىرىڭعاي تولەم كارتالارى بازاسىن قۇرۋ, بۇل ءبىر ادامعا بىرنەشە كارتانىڭ شىعارىلۋى نەمەسە ءارتۇرلى كارتا يەلەرىنىڭ ءبىر SIM كارتاسىن قولدانۋى سياقتى زاڭسىز ارەكەتتەردى انىقتاۋعا كومەكتەسەدى.

كىمدەر كۇشەيتىلگەن باقىلاۋعا الىنادى?

جاڭا ەرەجەلەر كۇشەيتىلگەن باقىلاۋعا الىناتىن باسقا دا كليەنت ساناتتارىنا قاتىستى. ولاردىڭ قاتارىنا:

● ءبىر نەمەسە بىرنەشە بانكتەن بەس نەمەسە ودان دا كوپ كارتاسى بار ادامدار (بەلگىلەنگەن جاعدايلاردى قوسپاعاندا);

● تۇراقتى تۇرۋ ىقتيارحاتى نەمەسە ۆنج-سىز رەزيدەنت ەمەستەر;

● 14 پەن 25 جاس ارالىعىنداعى رەسمي تابىسى جوق, ءۇشىنشى تۇلعالارعا ءىرى كولەمدە ءجيى اۋدارىم جاسايتىن ادامدار;

● شەكارا ماڭىنداعى بولىمشەلەردە نەمەسە بانكتىڭ ەلەكتروندىق قۇرىلعىلارى (مىسالى, كارتوماتتار) ارقىلى كارتا العان كليەنتتەر.

سونداي-اق, كارتا ماقساتى مەن وپەراتسيا سيپاتى اراسىنداعى سايكەسسىزدىكتەر انىقتالاتىن بولادى. ەگەر كۇدىك تۋىنداسا, بانك:

● كليەنتكە ساۋالناما جىبەرەدى;

● قايتا سايكەستەندىرۋ جۇرگىزەدى (بيومەتريانى قوسا العاندا);

● قاجەت بولعان جاعدايدا ونلاين قىزمەت كورسەتۋدى ۋاقىتشا توقتاتىپ, تەرەڭدەتىلگەن تەكسەرۋ باستايدى.

دروپپەرلەرمەن كۇرەسكە ەرەكشە نازار اۋدارىلادى

قۇجاتتا كارتالاردى ءوز اتىنا راسىمدەپ, كەيىن ولاردى ءۇشىنشى تۇلعالارعا بەرەتىن دروپپەرلەرمەن كۇرەسكە ەرەكشە نازار اۋدارىلعان. بۇل ماقساتتا:

● دروپپەرلەردى انىقتاۋ ءۇشىن جاساندى ينتەللەكت پەن تسيفرلىق شەشىمدەردى قولدانۋ;

● بانكتەر كارتالار مەن وپەراتسيالار تۋرالى ەگجەي-تەگجەيلى اقپاراتتى جىبەرەتىن انتيفرود-ورتالىق قۇرۋ;

● ءبىر تەلەفون نومىرىنەن ءارتۇرلى ادامداردىڭ كارتالارىن پايدالانۋ سياقتى زاڭسىز ارەكەتتەر انىقتالعان جاعدايدا, بارلىق ەكىنشى دەڭگەيلى بانكتەردە كۇدىكتى كارتالار مەن شوتتاردى بۇعاتتاۋ جۇيەسىن ەنگىزۋ ۇسىنىلادى.

شەكاراارالىق اۋدارىمداردى باقىلاۋ كۇشەيتىلەدى. 500 000 تەڭگەدەن اساتىن وپەراتسيالار قوسىمشا تەكسەرۋدەن وتەدى.