قازاقستاندىق بۋكمەكەرلەر دەپۋتات رۋسلان بەردەنوۆتى سوتقا بەردى

فوتو: parlam.kz

قازاقستان بۋكمەكەرلىك كەڭسەلەر قاۋىمداستىعى ءماجىلىس دەپۋتاتى رۋسلان بەردەنوۆتى سوتقا بەردى. بۇل تۋرالى qandastar.kz Stan.kz اقپارات اگەنتتىگىنە سىلتەمە جاساپ حابارلايدى.

بۋكمەكەرلەر دەپۋتاتتى جالعان اقپارات تاراتتى دەپ ايىپتاپ الماتى قالاسى بوستاندىق اۋداندىق سوتىنا شاعىم تۇسىرگەن.

«جاۋاپكەر, پارلامەنت ماجىلىسىنىڭ دەپۋتاتى بولا تۇرا, ويىن بيزنەسى مەن سپورتتىق ءباس تىگۋلەردى ۇيىمداستىرۋشىلاردىڭ ىسكەرلىك بەدەلىنە نۇقسان كەلتىرەتىن جالعان مالىمەتتەردى تاراتۋعا بىرنەشە رەت جول بەرگەن», – دەلىنگەن ارىزدا.

ارىزدانۋشىلاردىڭ ايتۋىنشا, ار-نامىستى بۇزاتىن اقپاراتتى تاراتۋ ايىپتالۋشىنىڭ دەپۋتاتتىق قىزمەتى اياسىندا كوپشىلىك الدىندا سويلەگەن سوزىندە دە, الەۋمەتتىك جەلىلەر مەن ينتەرنەت-اقپاراتتىق رەسۋرستار ارقىلى دا ورىن العان.

«جاۋاپكەر تاراتقان جالعان اقپارات, باسقالارمەن قاتار, رەتتەۋ شارالارىن كۇشەيتۋگە, سالانى جانە ونىمەن بايلانىستى سالالاردى مونوپوليالاۋعا, كاسىپكەرلىك فۋنكتسيالاردى دەلدالداردىڭ پايداسىنا بەرۋگە نەمەسە كاسىپكەرلىك قىزمەتتى شەكتەۋگە اقپاراتتىق سەبەپ بولدى. اتاپ ايتقاندا, سوتتالۋشى كوپشىلىككە تاراتقان اقپارات ويىن بيزنەسى جانە سپورتتىق ءباس تىگۋلەردى ۇيىمداستىرۋ سالاسىنداعى رەتتەۋدى قاتايتاتىن بىرقاتار زاڭ جوبالارىن دالەلدەۋ كەزىندە پايدالانىلدى», – دەلىنگەن ارىز ماتىنىندە.

قاۋىمداستىق ۋاكىلەتتى ورگاندارعا بەردەنوۆ تاراتقان اقپاراتتارعا قاتىستى دەرەكتەر مەن ستاتيستيكالىق مالىمەتتەردى ۇسىنۋ تۋرالى ساۋالدار جولداعان.

“باس پروكۋراتۋرانىڭ جاۋابىندا قۇمار ويىندارعا نەگىزدەلگەن ءوز-وزىنە قول جۇمساۋ جانە قۇمار ويىندارى نەگىزىندە تىركەلگەن قىلمىستىق قۇقىق بۇزۋشىلىقتار تۋرالى ستاتيستيكالىق ەسەپتەردى جۇرگىزبەيتىنى ايتىلعان. قازاقستاندا قازىردىڭ وزىندە 350 مىڭعا جۋىق قازاقستاندىقتىڭ قۇمار ويىندارعا تاۋەلدى ەكەندىگى تۋرالى دەرەكتەر راستالمادى, ويتكەنى دەنساۋلىق ساقتاۋ مينيسترلىگىنىڭ جاۋابىندا 2023 جىلدىڭ سەگىز ايىنداعى رەسمي ستاتيستيكاعا سايكەس, وسى دياگنوزبەن 10 ادام ديناميكالىق باقىلاۋدا بولعان. ءبىر قازاقستاندىق قۇمار ويىنشىعا شاققانداعى قارىزدىڭ ورتاشا سوماسى 10 ميلليون تەڭگە شەگىندە ەسەپتەلەتىنى تۋرالى مالىمەتتەردى دە ۇلتتىق بانك راستاماعان; اجىراسۋدىڭ نەگىزگى سەبەبى رەتىندە «ويىنعا تاۋەلدىلىك» جانە «ويىنعا تاۋەلدى بالالار تۋرالى» دەرەكتەرى راستالمادى, ويتكەنى مۇنداي دەرەكتەر وقۋ-اعارتۋ مينيسترلىگىندە دە, ادىلەت مينيسترلىگىندە دە جوق”, – دەلىنگەن ارىزدا.

ولار سوتتان بەردەنوۆ تاراتقان جالعان اقپاراتتى ويىن بيزنەسىن ۇيىمداستىرۋشى زاڭدى تۇلعالاردىڭ ىسكەرلىك بەدەلىنە نۇقسان كەلتىردى دەپ تانۋدى, ويىن بيزنەسىن ۇيىمداستىرۋشىلاردىڭ ىسكەرلىك بەدەلىنە نۇقسان كەلتىرەتىن ونىڭ تاراتقان جالعان اقپاراتىن تەرىسكە شىعارۋعا مىندەتتەۋدى, سونداي-اق بىرلەستىكتىڭ پايداسىنا سوت شىعىندارىن ءوندىرىپ الۋدى تالاپ ەتكەن.

ەسكە سالساق, بۇعان دەيىن قازاقستاندا بۋكمەكەرلىك كەڭسەلەر مەن كازينولار قۇمار ويىنداردىڭ قاۋپى تۋرالى ەسكەرتۋگە مىندەتتەلەتىنى تۋرالى جازعان ەدىك.