قازاقستاندىق دارىگەرلەردىڭ ورتاشا جالاقىسى – 597 مىڭ تەڭگە

فوتو: اشىق دەرەككوز

قازاقستاننىڭ دەنساۋلىق ساقتاۋ مينيسترلىگى 2024 جىلى ەلىمىزدەگى اق حالاتتىلاردىڭ ايلىعى تۋرالى ايتتى. ۆەدومستۆو قازاقستاندىق دارىگەرلەردىڭ ورتاشا جالاقسى 597 مىڭ تەڭگە بولىپ بەلگىلەنگەنىن ءمالىم ەتتى. سونداي-اق مينيسترلىك وكىلى مەديتسينا قىزمەتكەرلەرى جۇمىس وتىلىنە جانە بىلىكتىلىگىنە قاراي ايلىق الاتىنىن مالىمدەدى, دەپ حابارلايدى qandastar.kz

مينيسترلىكتىڭ مالىمەتىنشە, 2020 جىلدان باستاپ 2023 جىلعا دەيىن, ياعني 4 جىل ارالىعىندا مەديتسينا قىزمەتكەرلەرىنىڭ جالاقىسىن جىل سايىن ارتتىرۋ جوسپارلاندى. اتاپ ايتقاندا, دارىگەردىڭ ايلىعى 30%-عا, ورتا مەديتسينا قىزمەتكەرىنىڭ (فەلشەر, اكۋشەر, مەيىرگەر, سانيتارلىق فەلدشەر) جالاقىسى 20%-عا كوبەيدى.

2024 جىلدىڭ ءۇشىنشى توقسانى بويىنشا جالاقى مولشەرى مىناداي (بىر ستاۆكا):

• ساناتى جوق, جۇمىس ءوتىلى 1 جىلعا دەيىنگى اۋىل دارىگەرىنىڭ جالاقىسى – 306,8 مىڭ تەڭگە بولسا, قالادا دارىگەرلەر 384,4 مىڭ تەڭگە ايلىق الادى.

2023 جىلى ەڭبەك تاجىريبەسى 1 جىلعا دەيىنگى, ەشقانداي ساناتقا جاتپايتىن دارىگەرلەردىڭ جالاقىسى شامامەن 306,8 مىڭ تەڭگە بولدى.

• بيىل 1-ساناتتى, 13-16 جىل جۇمىس ءوتىلى بار ورتا بۋىندى مەديتسينا قىزمەتكەرلەرىنىڭ ايلىعى 222,5 مىڭ تەڭگە بولىپ بەلگىلەندى. بۇل سانات بويىنشا اۋىلدا جۇمىس ىستەيتىن ورتا بۋىندى مەديتسينا قىزمەتكەرلەرى 245,9 مىڭ تەڭگە, ال قالادا 199,2 مىڭ تەڭگە جالاقى الادى.
• ال 1-ساناتتى, 13-16 جىل جۇمىس ءوتىلى بار دارىگەردىڭ جالاقىسى – 401,5 مىڭ تەڭگە. بۇل ساناتتاعى دارىگەرلەر اۋىلدا 445,5 مىڭ تەڭگە جالاقى السا, قالالىق دارىگەرلەر 357,5 مىڭ تەڭگە ايلىق بەلگىلەنگەن.

ايتا كەتەيىك, وتكەن جىلى 13–16 جىل ەڭبەك ءوتىلى (1 ستاۆكا) بار ءبىرىنشى ساناتتى جالپى تاجىريبەلىك دارىگەردىڭ جالاقىسى شامامەن 384 مىڭ تەڭگە ەدى.

• ال 1-ساناتتى, ەڭبەك ءوتىلى 20 جىلدان جوعارى اۋىلدا تۇراتىن جالپى تاجىريبەلىك دارىگەرلەر 400,7 مىڭ تەڭگە, قالالىقتار 501,7 مىڭ تەڭگە جالاقى الادى. ال بىلتىر ەڭبەك ءوتىلى 25 جىلدان جوعارى (1 ستاۆكا) جوعارى ساناتتى جالپى تاجىريبەلىك دارىگەردىڭ جالاقىسى شامامەن 430,6 مىڭ تەڭگە ەدى.

سونىمەن قاتار جەرگىلىكتى اتقارۋشى ورگانداردىڭ اقپاراتىنا سايكەس, 2024 جىلى قوسىمشا تولەمدەردى, اقىلى قىزمەتتەردى, كەشەندى جان باسىنا شاققانداعى ءنورماتيۆتىڭ ىنتالاندىرۋشى كومپونەنتى بويىنشا تولەمدەردى, سارالانعان تولەمدەردى ەسكەرە وتىرىپ, ورتاشا جالاقى (ەل بويىنشا):

• دارىگەر– 597 مىڭ تەڭگە;
• ورتا مەديتسينا قىزمەتكەر – 307 مىڭ تەڭگە بولدى.

ال 2023 جىلى قازاقستان بويىنشا دارىگەرلەردىڭ ورتاشا جالاقىسى قوسىمشا تولەمدەردى, اقىلى قىزمەتتەردى, جان باسىنا شاققانداعى ءنورماتيۆتىڭ ىنتالاندىرۋشى كومپونەنتى بويىنشا جانە سارالانعان تولەمدەردى ەسەپكە العاندا 519 مىڭ تەڭگەگە تەڭ بولدى.

دەنساۋلىق مينيسترلىگىنىڭ مالىمەتىنشە, دارىگەرلەردىڭ ايلىعى قىزمەتكەردىڭ جۇمىس وتىلىنە, بىلىكتىلىگىنە, ورىندالاتىن جۇمىستىڭ كۇردەلىلىگىنە, سانىنا جانە ساپاسىنا, سونداي-اق ەڭبەك جاعدايلارىنا قاراي سارالانىپ بەلگىلەنەدى.

سونداي-اق ۆەدومستۆو وكىلدەرى دارىگەرلەردىڭ ايلىعى ءبىر دەڭگەيدە تۇرىپ قالمايتىنىن ايتادى.

ء“ار ماماننىڭ جالاقىسى جۇمىس وتىلىنە, بىلىمىنە بايلانىستى وزگەرىپ وتىرادى. 2023 پەن 2024 جىلدىڭ ايلىقتارىندا ەش وزگەرىس جوق. ويتكەنى بيىل جالاقى ءالى وسكەن جوق”, – دەدى مينيسترلىك وكىلى.

ەلىمىزدىڭ دەنساۋلىق ساقتاۋ مينيسترلىگى بۇل رەتتە, 2024 جىلعا بەكىتىلگەن بيۋدجەتتىڭ شىعىندارىندا مەديتسينالىق قىزمەتكەرلەردىڭ جالاقىسىن ارتتىرۋ كوزدەلمەگەنىن مالىمدەدى.

مەديتسينا قىزمەتكەرلەرىن ىنتالاندىرۋ ماقساتىندا 2020–2023 جىل اراسىندا مەديتسينا قىزمەتكەرلەرىنىڭ ايلىعى كەزەڭ-كەزەڭىمەن كوتەرىلدى: دارىگەرلەردىكى – 30%-عا, ال فەلدشەرلەردىڭ جالاقىسى – 20%-عا ءوستى.