قازاقستاندىق ەلبرۋس شىڭىنىڭ ەڭ بيىك نۇكتەسىنە شىعىپ “اداي” كۇيىن شەرتتى

فوتو: ۆيدەودان كادر

قازاقستاندىق دومبىراشى الىبەك قايىربەك ەۋروپانىڭ ەڭ بيىك شىڭى ەلبرۋستا دومبىرامەن «اداي» كۇيىن شەرتتى. بۇل تۋرالى qandastar.kz Stan.kz-كە سىلتەمە جاساپ حابارلايدى.

26 جاستاعى استانالىق مۋزىكانتتىڭ ايتۋىنشا, ەلبرۋس شىڭىنا ءبىر اپتادا كوتەرىلگەن. ال دايىندىق التى ايعا سوزىلىپتى.

الىبەك – مۋزىكانت, بىراق مۋزىكادان بولەك, تاۋعا شىققاندى ۇناتادى. قازاقستاندىق ەلبرۋس شىڭىنا كوتەرىلگەن كوماندادا 15 الپينيست بولعانىن ايتتى.

«ال دومبىراعا كەلسەك, ول جەڭىل. سول سەبەپتى كەز كەلگەن جاعدايدا زاقىمدانۋى مۇمكىن. سوندىقتان سىنىپ قالماس ءۇشىن ونى كادىمگى ورامالمەن وراپ الدىم. سىرتىنان قاپتاعانعا جۇمساعىراق ماتەريال الدىم. تومەنگە قاراي قۇلاپ كەتپەۋگە تىرىستىم. دومبىرا زاقىمدانعان جوق”, – دەدى دومبىراشى.

ورىستىڭ ۇلى ەنتسيكلوپەدياسىنا سايكەس, ەلبرۋس – ەۋروپا مەن رەسەيدەگى ەڭ بيىك تاۋ جوتاسى. كاباردين-بالقار جانە قاراشاي-چەركەس رەسپۋبليكالارىنىڭ شەكاراسىندا, ۇلكەن كاۆكازدىڭ بۇيىرلىك جوتاسىندا ورنالاسقان. ەلبرۋس 23 مۇزدىقتان تۇراتىن مۇز كەشەنىمەن جابىلعان.

ەسكە سالايىق, قازاقستاندىق الپينيستەر كومانداسى Kazakh Everest Team سپورتتىق-پاتريوتتىق ەكسپەديتسياسى اياسىندا ەۆەرەست شىڭىنا شىعۋدى جوسپارلاعان ەدى.