قازاقستاندىق فارماتسەۆتيكالىق كومپانيالاردا ءدارى-دارمەك باعاسى تومەندەمەك

فوتو: skorex.su

دەنساۋلىق ساقتاۋ ءمينيسترى اقمارال ءالنازاروۆا قازاقستاندىق فارماتسەۆتيكالىق كومپانيالاردى الەۋمەتتىك جاۋاپكەرشىلىككە جانە ءدارى-دارمەك باعاسىن تومەندەتۋگە شاقىردى. بۇل تۋرالى Stan.kz اقپارات اگەنتتىگى حابارلايدى.

ءالنازاروۆا قازاقستاندىق فارماتسەۆتيكالىق كومپانيالاردىڭ جانە ءىرى ديستريبيۋتورلاردىڭ وكىلدەرىمەن كەزدەسۋ وتكىزدى. جيىندا 2025 جىلعا ارنالعان دارىلىك زاتتار مەن مەديتسينالىق ماقساتتاعى بۇيىمداردى ساتىپ الۋ ماسەلەلەرى تالقىلاندى.

«ساتىپ الۋ ناۋقانىن باستاماس بۇرىن, ءوندىرۋشى بەلگىلەگەن دارىلىك زاتتاردىڭ باعاسى قولايلى جانە قولجەتىمدى ەكەنىنە كوز جەتكىزۋ كەرەك. بۇل رەتتە جەرگىلىكتى ديستريبيۋتورلاردىڭ باعاسى رەگرەسسيۆتى ۇستەمەلەر شەگىندە قالۋى كەرەك», – دەدى مينيستر.

مەملەكەتتىك بيۋدجەت ەسەبىنەن ءدارى-دارمەك ساتىپ الۋ جانە ساقتاۋ جونىندەگى بىرىڭعاي وپەراتور «سق-فارماتسيا» جشس مالىمەتى بويىنشا, قازاقستاندىق وندىرۋشىلەرمەن تەندەر جانە ۇزاق مەرزىمدى كەلىسىمشارتتار ارقىلى ساتىپ الۋ ۇلەسى 88 پايىز بولدى. 2023 جىلى كاسىپورىن 21,5 ميلليارد تەڭگەگە جۋىق قارجىنى ۇنەمدەسە, بيىل 50 ميلليارد تەڭگە ۇنەمدەگەن.

دەگەنمەن, گەنەريكالىق نەمەسە بيوسيميليارلىق پرەپاراتتاردىڭ باعاسى باستاپقى پرەپاراتتاردىڭ قۇنىنان جوعارى بولاتىن جاعدايلار بار.

«ساتىپ الۋداعى وتاندىق ءونىمنىڭ ۇلەسىن ارتتىرۋ ءۇشىن 10 جىلعا دەيىن ۇزاق مەرزىمدى كەلىسىمشارتتار جاساسۋعا قولداۋ كورسەتۋ شاراسى قاراستىرىلعان. دەگەنمەن, بارلىق وندىرۋشىلەر مەن ديستريبيۋتورلار جەڭىلدىكتەر بەرمەيدى», – دەدى مينيستر.

ءالنازاروۆا فارماتسەۆتيكالىق كومپانيالاردى «باعانى تومەندەتۋدى قايتا قاراۋعا» شاقىردى.

ايتا كەتەيىك, بۇعان دەيىن سىبايلاس جەمقورلىققا قارسى ءىس-قيمىل اگەنتتىگى 6,7 ميلليارد تەڭگەنىڭ سىبايلاس جەمقورلىق تاۋەكەلدەرىن انىقتادى. سونداي-اق «سق-فارماتسيا» جشس قىزمەتىندە كارتەلدىك ءسوز بايلاسۋ بەلگىلەرىن انىقتاعانىن حابارلاعان.

اگەنتتىك مالىمەتىنشە, كومپانيا ەڭ جوعارى باعا بويىنشا تەندەرلەردى ۇتىپ الىپ, قازاقستاندىق كومپانيالارعا قولعاپتار, شپريتستەر مەن يود ءوندىرۋدىڭ ورنىنا شەتەلدەن اكەلۋگە كومەكتەسكەن.

سونداي-اق دەنساۋلىق ساقتاۋ مينيسترلىگىنە قاراستى تاعى ءۇش ۇيىمنىڭ قىزمەتىندە زاڭ بۇزۋشىلىقتار انىقتالدى. سودان كەيىن ءتورت ۇيىمنىڭ باسشىلارى دا قىزمەتىنەن بوساتىلدى.