قازاقستاندىق فوتوگراف بەيسەن قۇرانبەكتىڭ سۋرەتىن كىتاپقا رۇقساتسىز شىعارعانداردان 55 ميلليون تەڭگە تالاپ ەتتى

فوتو: جەڭىس ىسقابايدىڭ Instagram پاراقشاسىنان

قازاقستاندىق فوتوگراف جەڭىس ىسقاباي اۆتورلىق قۇقىقتى بۇزعانى ءۇشىن «وتباسى حرەستوماتياسى» قوعامدىق قورىنان 55,3 ميلليون تەڭگە تالاپ ەتتى. ول ءوزى تۇسىرگەن بەيسەن قۇرانبەكتىڭ فوتوسىن رۇقساتسىز كىتاپقا باسىپ شىعارعانىنا نارازى. ال كىتاپتى شىعارۋعا قاتىسقانداردىڭ ءبىرى – دەپۋتات ابزال قۇسپان. بۇل تۋرالى qandastar.kz   Stan.kz اقپارات اگەنتتىگىنە سىلتەمە جاساپ حابارلايدى.

قور جەڭىس ىسقاباي 2014 جىلى تۇسىرگەن پورترەتتى «بەيسەن جانە بولمىس» كىتابىنىڭ مۇقاباسىنا قويىپ, ونىڭ كوشىرمەسىن الەۋمەتتىك جەلىلەر مەن otbasy.com سايتىنا ورنالاستىرعان. كىتاپ ازىرلەۋشىلەرى سۋرەتتىڭ اۆتورىن كورسەتپەگەن, پايدالانۋعا رۇقسات تا سۇرالماعان ەكەن. كىتاپ العاش رەت 2021 جىلى جارىق كورىپ, ارقايسىسى ءۇش مىڭ تەڭگەدەن ساتىلعان.

جەڭىس ىسقابايدىڭ ايتۋىنشا, كىتاپ بەستسەللەرگە اينالىپ, ءبىر جىلدان كەيىن تاعى 1500 داناسى قايتا شىعارىلعان. وسىدان كەيىن شىعارما مەزگىل-مەزگىل شىعارىلىپ وتىرعان. يدەيانىڭ اۆتورى جانە وسى كىتاپتى جاساۋعا شابىتتاندىرۋشى — ءماجىلىس دەپۋتاتى ابزال قۇسپان. فوتوگرافتىڭ ايتۋىنشا, وعان جەكە شاعىمدار جوق, تەك ادىلدىكتى قالپىنا كەلتىرۋدى تالاپ ەتەدى.

ال جاۋاپكەردىڭ وكىلى فوتوگرافتىڭ دالەلدەرىن تولىق مويىندامادى. بۇل كىتاپتاردى باسىپ شىعارعان باسپاحانانىڭ قاتەسىن العا تارتتى.

«كىتاپتا مەنەن باسقا كىتاپ جاساۋعا قاتىسقان بارلىق اۆتورلار تۋرالى جازىلعان. ارينە, مۇنداي جۇمىستىڭ پايدا بولعانى قۋانتادى. بىراق نەگە مەنىڭ دە جۇمىسىم بار بولسا, ول ايتىلماعان? الدىمەن ەسكەرتۋلەر جاساپ ءجۇردىم, كەيىن شىققان باسىلىمداردا دا مەنىڭ اۆتورلىعىم جوق ەكەنىن ءبىلدىم», – دەدى فوتوگراف.

مارقۇم بەيسەن قۇرانبەكتىڭ جۇبايى دا فوتونىڭ جەڭىس ىسقابايعا تيەسىلى ەكەنىن راستادى. بىراق مۇنداي داۋ تۋىنداۋى مۇمكىن دەپ ويلاماپتى. ويتكەنى شىعارما كۇيەۋىن ەسكە الۋعا ارنالعان.

سوت شەشىم شىعارىپ, جەڭىس ىسقابايدىڭ قۇقىقتارى شىنىمەن دە بۇزىلدى دەگەن قورىتىندىعا كەلدى. بىراق جاۋاپكەرلەر بۇل كىتاپتى بەيسەن قۇرانبەكتى ەسكە الۋ ءۇشىن جاساعانىن ەسكەرىپ, (كىتاپتىڭ اۆتورى ونىڭ دوسى — سانجار كەرىمباي) فوتوگرافقا ول سوتتا كورسەتكەن 55,3 ميلليون تەڭگەنىڭ ورنىنا 500 اەك (1 846 000 تەڭگە) تولەۋ تۋرالى قاۋلى شىعاردى.

«جەڭىس ىسقابايدىڭ تالابى ءىشىنارا قاناعاتتاندىرىلسىن. بۇزىلعان اۆتورلىق قۇقىق ءۇشىن «وتباسى حرەستوماتياسى» قوعامدىق قورىنان 500 اەك وتەماقى ءوندىرىپ الىنسىن. جەڭىس ىسقابايدىڭ بۇزىلعان اۆتورلىق قۇقىعى قالپىنا كەلتىرىلسىن. «وتباسى حرەستوماتياسى» قوعامدىق قورىنان وكىلدىڭ قىزمەتتەرىنە اقى تولەۋ جونىندەگى شىعىندار 505 050 تەڭگە مولشەرىندە, نوتاريۋستىڭ قىزمەتتەرىنە اقى تولەۋ جونىندەگى شىعىندار 102 564 تەڭگە مولشەرىندە ءوندىرىپ الىنسىن. جەڭىس جۇمالى ۇلى ىسقاباەۆتىڭ تالاپ ارىزىنىڭ قالعان بولىگىن قاناعاتتاندىرۋدان باس تارتىلادى», – دەلىنگەن سوت شەشىمىندە.