قازاقستاندىق ىشكى اعزالارىن 15 ميلليون تەڭگەگە ساتپاق بولعان

اقتوبە وبلىسى پروكۋراتۋراسى ادامنىڭ ىشكى اعزالارىن زاڭسىز ساتۋ ارەكەتىن انىقتادى. بۇل تۋرالى qandastar.kz سايتى قۇزىرلى ورگاننىڭ ءباسپاسوز قىزمەتىنە سىلتەمە جاساپ حابارلايدى.

وبلىستىق پروكۋرورلار بۇل زاڭسىز ارەكەتتى الەۋمەتتىك جەلىگە ورنالاستىرىلعان جاريالانىمدارعا مونيتورينگ جۇرگىزۋ بارىسىندا انىقتاعان.

“اقتوبە قالاسى تۇرعىندارىنىڭ بىرى ءوزىنىڭ ىشكى اعزالارىن ساتۋ بويىنشا ىقتيمال زاڭسىز مامىلە جاساماق بولعانى تۋرالى اقپارات الىندى”, – دەلىنگەن حابارلامادا.

الىنعان مالىمەتتەر نەگىزىندە وبلىستىق پوليتسيا دەپارتامەنتى وكىلدەرى جەدەل-ىزدەستىرۋ ءىس-شارالارىن جۇرگىزگەن. ناتيجەسىندە 30 ساۋىردە ۇيىمداسقان قىلمىسقا قارسى كۇرەس باسقارماسىنىڭ قىزمەتكەرلەرى جالپى سومماسى 15 ملن تەڭگەگە ادامنىڭ ىشكى اعزالارىن ساتۋ بويىنشا زاڭسىز مامىلە جاساماق بولعان كۇدىكتىنى ۇستاعان.

“بۇل دەرەك بويىنشا قىلمىستىق كودەكستىڭ 116-بابىنىڭ 1-بولىگىمەن (ادامنىڭ اعزالارى مەن تiندەرiن الىپ قويۋعا ماجبۇرلەۋ نەمەسە زاڭسىز الىپ قويۋ) سوتقا دەيىنگى تەرگەپ-تەكسەرۋ باستالدى”, – دەپ مالىمدەدى ۆەدومستۆو وكىلدەرى.

قازىر بۇل دەرەك بويىنشا تەرگەۋ امالدارى جۇرگىزىلىپ جاتىر.