جاڭالىقتار
قازاقستاندىق كەلىنشەك دۇرىس وتا جاسالماعانى ءۇشىن اۋرۋحانادان 2 ميلليون تەڭگە ءوندىرىپ الدى
فوتو: depositphotos.سوm
قىزىلوردالىق سوت قالا تۇرعىنىنىڭ ءسۇت بەزىنە دۇرىس ەمەس وتا جاساتقان اۋرۋحاناعا قاتىستى ازاماتتىق تالاپ ارىزىن قارادى.
ماممولوگ دارىگەر قىزىلوردا تۇرعىنىنا «سول جاق ءسۇت بەزىنىڭ فيبروادەنوماسى» دياگنوزىن قويىپ, تۇرعىلىقتى جەرى بويىنشا جەدەل ەم قابىلداۋدى ۇسىندى. ايەلگە اۋرۋحاناعا جوسپارلى تۇردە جاتقىزۋعا جولداما بەرىلدى, وندا وعان بىردەن وتا جاسالدى. ەمدەۋدەن كەيىن ايەلدىڭ جاعدايى ناشارلادى. ول قىزىلوردا وبلىسى بويىنشا مەديتسينالىق جانە فارماتسەۆتيكالىق باقىلاۋ كوميتەتىنىڭ دەپارتامەنتىنە شاعىمداندى, وسىعان بايلانىستى اۋرۋحانادا جوسپاردان تىس تەكسەرۋ باستالدى.
تەكسەرۋ دياگنوستيكا مەن ەمدەۋدىڭ كلينيكالىق حاتتامالارى ساقتالماعانىن انىقتادى. وعان قوسا, حيرۋرگ وپەراتسيانى ونكولوگتىڭ سەرتيفيكاتىنسىز جاسادى. اۋرۋحانانىڭ مەملەكەتتىك ليتسەنزياسىندا ونكولوگيالىق كومەك كورسەتۋ تۋرالى قوسىمشا بولماعان. حيرۋرگ-دارىگەر مەن اۋرۋحانا زاڭگەرىنە اكىمشىلىك ايىپپۇل سالىندى.
وسىدان كەيىن, ايەل قىزىلوردا قالالىق سوتىنا مورالدىق شىعىن ءوندىرۋ تۋرالى شاعىم تۇسىرگەن. ول وپەراتسيا كەزىندە ىسىكپەن تومەنگى بولىگى ەمەس, سول جاق ءسۇت بەزىنىڭ جوعارعى جاعى كەسىلگەنىن كورسەتتى. قايتالاپ ۋلترادىبىستىق زەرتتەۋدە ىسىك جويىلماعانى انىقتالدى. دارىگەر نەمقۇرايلىلىق تانىتقان, سونىڭ سالدارىنان اۋرۋى اسقىنىپ, پسيحيكالىق جانە فيزيكالىق ازاپقا ۇشىراعان.
– قىزىلوردا قالالىق سوتى تالاپتى قاناعاتتاندىرىپ, اۋرۋحانادان تالاپكەردىڭ پايداسىنا 2 000 000 تەڭگە كولەمىندە مورالدىق زياندى ءوندىرىپ الۋ تۋرالى شەشىم شىعاردى. اۋرۋحانا شەشىممەن كەلىسپەدى جانە اپەللياتسيالىق شاعىممەن وبلىستىق سوتتىڭ ازاماتتىق ىستەر جونىندەگى سوت القاسىنا جۇگىندى. ءىستىڭ بارلىق ءمان – جايلارىن زەردەلەگەننەن كەيىن سوت القاسى ءبىرىنشى ساتىداعى سوتتىڭ شەشىمىن وزگەرىسسىز, اپەللياتسيالىق شاعىمدى قاناعاتتاندىرماي قالدىردى, –دەپ حابارلادى سوت وكىلدەرى.
