قازاقستاندىق كومپانيا ۇمراعا اپارامىن دەپ جۇزدەگەن ادامدى الداعان

فوتو: اشىق دەرەككوز

قازاقستان مۇسىلماندارى ءدىني باسقارماسى ۇمراعا الىپ بارامىن دەپ جۇزدەن اسا ادامدى الداپ كەتكەن كومپانياعا قاتىستى تۇسىنىكتەمە بەردى, دەپ جازدى qandastar.kz

بۇعان دەيىن باق-تا ىرىسكەلدى مەيىرجان ەسىمدى نايب يمام 180 ادامدى قاجىلىققا اپارامىن دەپ الداپ كەتكەنى جايلى اقپارات تارادى. الايدا قمدب ونىڭ يمام ەكەنىن جوققا شىعاردى.

«ىرىسكەلدى مەيىرجان باۋىر ۇلى ەلىمىزدىڭ بىرنەشە ايماعىنان جۇزدەن اسا ازاماتتى ۇمراعا الىپ بارامىن دەپ اقشا جيناپ, ۋادەسىن ورىنداي الماعان. مەيىرجان باۋىر ۇلى ەشقانداي ءدىني قىزمەت اتقارماعان جانە مەشىتتە نايب يمام بولىپ جۇمىس ىستەمەيدى», – دەدى ءدىني باسقارماسىندا.

الماتى وبلىسىنىڭ ىلە اۋدانىنداعى «سابدەن ۇلى وتەگەن باتىر» مەشىتىنىڭ نايب يمامى ىرىسكەلدى مەيىرجانعا ۇمرا ساپارىنا نيەت ەتكەن جاندارعا ءدارىس وتكىزۋگە كومەكتەسكەن.

«الماتى وبلىسىنىڭ ىلە اۋدانىنداعى «سابدەن ۇلى وتەگەن باتىر» مەشىتىنىڭ نايب يمامى تاماشبەكوۆ مارسەلگە مەيىرجان باۋىر ۇلى ۇمرا ساپارىنا نيەت ەتكەن جاندارعا ءدارىس ءوتىپ بەرۋ جونىندە ءوتىنىش جاساعان. نايب يمام ءدىني قۇلشىلىقتى ءتۇسىندىرۋ ماقساتىندا وتىنىشتەرىن قابىل الىپ, ەكى رەت ساباق وتكىزگەن. ءدارىس سوڭى سۇراق-جاۋاپ نەگىزىندە جالعاسىپ, نايب يمام سول كومپانيا قىزمەتى جايلى بىلگەن اقپاراتتارىمەن دە بولىسكەن», – دەدى قمدب تۇسىنىكتەمەسىندە.

«Jazەra travel» كومپانياسىنا قاتىستى داۋلى ماسەلە قۇقىق قورعاۋ ورگاندارى تاراپىنان تەكسەرىلىپ جاتىر. نايب يمامنىڭ اتالمىش ماسەلەگە قاتىسى بار-جوعى انىقتالىپ جاتىر.

سوڭعى كەزدە قوعامدا ۇمرا ساپارىن ۇيىمداستىرۋشى كەيبىر تۋرفيرمالاردىڭ كۇماندى ءىس-ارەكەتتەرىنە قاتىستى شاعىمدار كوبەيىپ كەتتى.

«وسى ورايدا ۇمراعا باراتىن ازاماتتارعا قىزمەت كورسەتۋ, ولاردىڭ قاۋىپسىزدىگىن قامتاماسىز ەتۋ اتالمىش تۋرفيرمالار جاۋاپكەرشىلىگىندە ەكەنىن ەسكە سالامىز. قر سىرتقى ءتۋريزمدى رەتتەيتىن ءتيىستى زاڭناماسىنا ساي ۇمرا ساپارىن توپپەن ۇيىمداستىرۋ ءۇشىن مىندەتتى تۇردە مەملەكەتتىك ليتسەنزياسى بولۋى ءتيىس جانە ءار ۇمرا جاساۋشىعا تۋروپەراتور تاراپىنان تۋركود بەرىلۋى قاجەت. مۇنداي تالاپتار ورىندالماعان جاعدايدا ۇمرانى توپپەن ۇيىمداستىرۋ قر زاڭدارىنا قايشى. وسى رەتتە ۇمراعا اپارۋشى تۋرفيرمالاردىڭ قىزمەتىن قاداعالاۋعا ءدىني باسقارمانىڭ زاڭدى قۇزىرەتى جوق ەكەندىگىن جەتكىزەمىز», – قازاقستان مۇسىلماندارى ءدىني باسقارماسى.

قمدب قازاقستاندىقتاردى رەسمي تۋروپەراتورلىق ليتسەنزياسى جوق تۋركومپانيالارمەن ۇمرا ساپارىنا بارماۋعا شاقىردى.