قازاقستاندىق قىز انتاركتيدانىڭ شىڭىنا شىقتى

فوتو: اباي وبلىسىنىڭ اكىمدىگى

اباي وبلىسى بەسقاراعاي اۋدانىنىڭ تۇرعىنى ءجاميلا باشيروۆا انتاركتيدانىڭ ەڭ بيىك شىڭىن باعىندىردى, دەپ حابارلايدى Skifnews.kz اقپارات پورتالى. 

ءجاميلا الەمنىڭ سۋىق كونتينەنتى – انتاركتيدانىڭ ەڭ بيىك نۇكتەسى ۆينسون ءماسسيۆىن باعىندىردى. ول 1980 جىلى بەسقاراعاي اۋدانى, بولشايا-ۆلاديميروۆكا اۋىلىندا دۇنيەگە كەلگەن. ءجاميلا بۇگىندە الماتى قالاسىندا تۇرادى.

ءجاميلانىڭ الپينيزمگە قىزىعۋشىلىعى پاندەميا كەزىندە باستالعان. ول لەنين شىڭىنا جەتى رەت كوتەرىلگەن تاجىريبەلى الپينيست الەكسەي كريۆورۋچكومەن بىرگە تاۋعا شىعا باستايدى. كەيىن سپورت شەبەرى, الپينيزم بويىنشا ءبىرىنشى ساناتتى نۇسقاۋشى الەكساندر سوفرىگيننىڭ باسشىلىعىمەن «Q14 Mountain Club» قازاقستاندىق تاۋ كلۋبىندا الپينيزم نەگىزدەرىن ۇيرەنگەن.

ء«ۇش جىل ىشىندە ءجاميلا الەمنىڭ ايگىلى شىڭدارىنا كوتەرىلىپ, ۇلكەن جەتىستىكتەرگە قول جەتكىزدى. وعان ەۋروپانىڭ ەڭ بيىك نۇكتەسى – ەلبرۋسقا (5 642 م), وڭتۇستىك امەريكانىڭ ەڭ بيىك شىڭى – اكونكاگۋاعا (6 962 م), سونداي-اق قىرعىزستانداعى لەنين شىڭىنا (7 134 م) ەكى مارتە شىعۋعا مۇمكىندىك تۋدى. ال وتكەن جىلى 6 119 مەتر بيىكتىكتەگى لوبۋچە مەن الەمنىڭ ەڭ بيىك نۇكتەسى – ەۆەرەست شىڭىنا (8 848 م) شىقتى», – دەلىنگەن اباي وبلىسى اكىمدىگىنىڭ جەلىدەگى پاراقشاسىندا.

ەندى مىنە, انتاركتيدانىڭ ۆينسون ماسسيۆىنە دە تابانى ءتيىپ وتىر. 1957 جىلى عانا الەمگە ايگىلى بولعان تاۋ شىڭى امەريكالىق تانىمال ساياساتكەر كارل ۆينسوننىڭ ەسىمىمەن اتالادى. كۇنى بۇگىنگە دەيىن شىڭعا شىققان مىڭنان اسا الپينيستەر قاتارىندا ەندى وتانداسىمىزدىڭ دا ەسىمى اتالادى.

ۆينسون شىڭىندا قاراشادان قاڭتارعا دەيىن پوليارلىق كۇن جاعدايىنىڭ وزىندە اۋا تەمپەراتۋراسى -40-تان -70 گرادۋسقا دەيىن جەتەدى. تاعى ءبىر ەرەكشەلىگى, مۇندا ۇزدىكسىز قاتتى بوران سوعىپ تۇرادى.