Qazaqstandyq qyz Antarktıdanyń shyńyna shyqty

Foto: Abaı oblysynyń ákimdigi

Abaı oblysy Besqaraǵaı aýdanynyń turǵyny Jámıla Bashırova Antarktıdanyń eń bıik shyńyn baǵyndyrdy, dep habarlaıdy Skifnews.kz aqparat portaly. 

Jámıla álemniń sýyq kontınenti – Antarktıdanyń eń bıik núktesi Vınson massıvin baǵyndyrdy. Ol 1980 jyly Besqaraǵaı aýdany, Bolshaıa-Vladımırovka aýylynda dúnıege kelgen. Jámıla búginde Almaty qalasynda turady.

Jámılanyń alpınızmge qyzyǵýshylyǵy pandemııa kezinde bastalǵan. Ol Lenın shyńyna jeti ret kóterilgen tájirıbeli alpınıst Alekseı Krıvorýchkomen birge taýǵa shyǵa bastaıdy. Keıin sport sheberi, alpınızm boıynsha birinshi sanatty nusqaýshy Aleksandr Sofrygınniń basshylyǵymen «Q14 Mountain Club» qazaqstandyq taý klýbynda alpınızm negizderin úırengen.

«Úsh jyl ishinde Jámılá álemniń áıgili shyńdaryna kóterilip, úlken jetistikterge qol jetkizdi. Oǵan Eýropanyń eń bıik núktesi – Elbrýsqa (5 642 m), Ońtústik Amerıkanyń eń bıik shyńy – Akonkagýaǵa (6 962 m), sondaı-aq Qyrǵyzstandaǵy Lenın shyńyna (7 134 m) eki márte shyǵýǵa múmkindik týdy. Al ótken jyly 6 119 metr bıiktiktegi Lobýche men álemniń eń bıik núktesi – Everest shyńyna (8 848 m) shyqty», – delingen Abaı oblysy ákimdiginiń jelidegi paraqshasynda.

Endi mine, Antarktıdanyń Vınson massıvine de tabany tıip otyr. 1957 jyly ǵana álemge áıgili bolǵan taý shyńy amerıkalyq tanymal saıasatker Karl Vınsonnyń esimimen atalady. Kúni búginge deıin shyńǵa shyqqan myńnan asa alpınıster qatarynda endi otandasymyzdyń da esimi atalady.

Vınson shyńynda qarashadan qańtarǵa deıin polıarlyq kún jaǵdaıynyń ózinde aýa temperatýrasy -40-tan -70 gradýsqa deıin jetedi. Taǵy bir ereksheligi, munda úzdiksiz qatty boran soǵyp turady.