قازاقستاندىق قىزدارعا اپۆ-عا قارسى امەريكالىق ۆاكتسينا سالىنادى

ەكپەگە اپۆ-نىڭ بارىنشا ونكوگەندى تۇرلەرىنەن قورعايتىن «مەرك شارپ جانە دوۋم» (اقش) كومپانياسى شىعارعان 4 ۆالەنتتى «گارداسيل» ۆاكتسيناسى قولدانىلادى.

«اپۆ-عا قارسى ۆاكتسيناتسيا ونكولوگيالىق اۋرۋلاردىڭ, سونىڭ ىشىندە جاتىر موينى وبىرىنىڭ اۋىرتپالىعىن ازايتۋعا مۇمكىندىك بەرەدى جانە جالپى حالىقتىڭ دەنساۋلىق كورسەتكىشتەرىن جاقسارتۋعا جانە ونكولوگيالىق اۋرۋلاردان بولاتىن سىرقاتتانۋشىلىق پەن ءولىم-ءجىتىمدى تومەندەتۋگە ىقپال ەتەدى», – دەدى ز. احمەتوۆا ورتالىق كوممۋنيكاتسيالار قىزمەتىندە.

سپيكەردىڭ ايتۋىنشا, قازاقستاندا جاتىر موينى وبىرى بارلىق جاستاعى ايەلدەر اراسىندا ءسۇت بەزى وبىرىنان كەيىنگى ەكىنشى ورىندا تۇر جانە فەرتيلدى جاستاعى (25-44 جاس) ايەلدەر ءولىمى بويىنشا ەكىنشى ورىندا تۇر.

«ەلىمىزدە جىل سايىن جاتىر موينى وبىرىنىڭ 1900-گە جۋىق جاڭا جاعدايى تىركەلەدى, جىل سايىن 600-دەن استام ايەل وسى پاتولوگيادان قايتىس بولادى. بۇگىنگى تاڭدا پاپيللوما ۆيرۋسىن جۇقتىرۋدىڭ جانە جاتىر موينى وبىرىنىڭ دامۋىنىڭ الدىن الۋدىڭ جالعىز جولى – ۆاكتسينالاۋ», – دەدى سپيكەر.

سىرقاتتىڭ اۋىرتپالىعىن جانە اپۆ-عا قارسى ۆاكتسيناتسيالاۋدىڭ تيىمدىلىگىن ەسكەرە وتىرىپ, 135 مەملەكەت, ونىڭ ىشىندە وزبەكستان, قىرعىزستان, تاجىكستان, تۇرىكمەنستان بۇل ۆاكتسينانى وزدەرىنىڭ ۇلتتىق يممۋنداۋ باعدارلامالارىنا ەنگىزگەن.