قازاقستاندىق ساراپشىلار الەۋمەتتىك جاعدايعا قاراماي, بارلىق بالاعا جاردەماقى تاعايىنداۋدى ۇسىندى

فوتو: اشىق دەرەككوز

ساراپشىلار بالالاردى ءبولىپ جارماي جاردەماقىنى بارىنە بىردەي بەرۋدى ۇسىنىپ وتىر. پىكىرلەرىنشە, الەۋمەتتىك تولەم وتباسىنىڭ تابىسىنا, مارتەبەسىنە, بالا سانىنا قاراي ۇلەستىرىلمەۋى ءتيىس. بۇل تۋرالى Stan.kz اقپارات اگەنتتىگى 31-ارنانىڭ ينفورمبيۋرو جاڭالىقتار باعدارلاماسىنا سىلتەمە جاساپ حابارلايدى.

بۇل مەملەكەتتىك قولداۋدىڭ شىن مۇقتاج جاندارعا جەتۋىنە سەپ بولادى دەيدى. ويتكەنى جاردەماقى الاتىندار قاتارىندا تابىسى جەتكىلىكتى وتباسىلار دا بار. ال جالعىزباستى اتا-انالار الەۋمەتتىك تولەمنەن قاعىلىپ وتىر.

قازىر ەلدە بالالارعا بەرىلەتىن جاردەماقى ءتۇرى دە, مولشەرى دە كوپ ەمەس. بالا كۇتىمى ءۇشىن الەۋمەتتىك تولەم 1,5 جىل بويى تولەنەدى. سوما – شامامەن 22 مىڭ تەڭگە. سونداي-اق كوپبالالى وتباسىلارعا بالا سانىنا قاراي ۇلەستىرىلەدى. ءتورت بالاعا 60 مىڭ تەڭگە جانە ءارى قاراي 4 ايلىق ەسەپتىك كورسەتكىش كولەمىندە ۇلعايىپ وتىرادى.

بىراق ۇل-قىزىن جالعىز تاربيەلەپ جۇرگەن اتا-انالارعا جاردەماقى بەرىلمەيدى. سوندىقتان «حالىق فينانس» ساراپشىلارى امبەباپ جاردەماقى ەنگىزۋدى ۇسىنىپ وتىر. سوعان سايكەس, تولەم تاعايىندالۋى ءۇشىن وتباسىنىڭ تابىسى, بالا سانى, مارتەبەسى ەسكەرىلمەۋى ءتيىس.

الايدا ساراپشى جانار جاندوسوۆا جاردەماقىنى وتباسىنىڭ الەۋمەتتىك جاعدايى مەن مارتەبەسىنە قاراماي تاعايىنداۋ ازىرگە مۇمكىن ەمەس دەيدى.

ويتكەنى بارلىق بالانى تولەممەن قامتاماسىز ەتۋگە بيۋدجەت قارجىسى جەتپەيدى. قازىر ۇكىمەت جاردەماقى ءۇشىن جالپى ىشكى ءونىمنىڭ نەبارى 0,5%-ىن بولىپ وتىر. بۇل – شامامەن 500 ميلليارد تەڭگە.

ء“بىز دامىعان ەلدەر سەكىلدى جالپى ىشكى ءونىمنىڭ 2-3%-ىن جۇمساساق, بۇكىل بالانى جاردەماقىمەن قامتي الامىز. بىراق قازىر مۇمكىن ەمەس. ءبىز اۋەلى وسى 500 ميلليارد تەڭگەنى مۇقتاج وتباسىلارعا جەتكىزۋگە كۇش سالۋىمىز قاجەت. ويتكەنى, قازىر 2-3 بالا تاربيەلەپ وتىرعان جالعىزباستى اتا-انالار تالاپقا ساي كەلمەگەنى ءۇشىن جاردەماقى الا الماي وتىر. سوندىقتان قولدانىستاعى جۇيەنى جەتىلدىرۋ كەرەك ”, – دەدى الەۋمەتتانۋشى جانار جاندوسوۆا.

ۇكىمەت الەۋمەتتىك تولەمدەرگە 2-3 تريلليون قاراجات قاراستىرىپ جاتسا, كەدەيلىك دەڭگەيى دە ايتارلىقتاي تومەندەۋى مۇمكىن ەكەن.