Qazaqstandyq sarapshylar áleýmettik jaǵdaıǵa qaramaı, barlyq balaǵa járdemaqy taǵaıyndaýdy usyndy

Foto: ashyq derekkóz

Sarapshylar balalardy bólip jarmaı járdemaqyny bárine birdeı berýdi usynyp otyr. Pikirlerinshe, áleýmettik tólem otbasynyń tabysyna, mártebesine, bala sanyna qaraı úlestirilmeýi tıis. Bul týraly Stan.kz aqparat agenttigi 31-arnanyń Informbıýro jańalyqtar baǵdarlamasyna silteme jasap habarlaıdy.

Bul memlekettik qoldaýdyń shyn muqtaj jandarǵa jetýine sep bolady deıdi. О́ıtkeni járdemaqy alatyndar qatarynda tabysy jetkilikti otbasylar da bar. Al jalǵyzbasty ata-analar áleýmettik tólemnen qaǵylyp otyr.

Qazir elde balalarǵa beriletin járdemaqy túri de, mólsheri de kóp emes. Bala kútimi úshin áleýmettik tólem 1,5 jyl boıy tólenedi. Soma – shamamen 22 myń teńge. Sondaı-aq kópbalaly otbasylarǵa bala sanyna qaraı úlestiriledi. Tórt balaǵa 60 myń teńge jáne ári qaraı 4 aılyq eseptik kórsetkish kóleminde ulǵaıyp otyrady.

Biraq ul-qyzyn jalǵyz tárbıelep júrgen ata-analarǵa járdemaqy berilmeıdi. Sondyqtan «Halyq fınans» sarapshylary ámbebap járdemaqy engizýdi usynyp otyr. Soǵan sáıkes, tólem taǵaıyndalýy úshin otbasynyń tabysy, bala sany, mártebesi eskerilmeýi tıis.

Alaıda sarapshy Janar Jandosova járdemaqyny otbasynyń áleýmettik jaǵdaıy men mártebesine qaramaı taǵaıyndaý ázirge múmkin emes deıdi.

О́ıtkeni barlyq balany tólemmen qamtamasyz etýge bıýdjet qarjysy jetpeıdi. Qazir úkimet járdemaqy úshin jalpy ishki ónimniń nebári 0,5%-yn bólip otyr. Bul – shamamen 500 mıllıard teńge.

“Biz damyǵan elder sekildi jalpy ishki ónimniń 2-3%-yn jumsasaq, búkil balany járdemaqymen qamtı alamyz. Biraq qazir múmkin emes. Biz áýeli osy 500 mıllıard teńgeni muqtaj otbasylarǵa jetkizýge kúsh salýymyz qajet. О́ıtkeni, qazir 2-3 bala tárbıelep otyrǵan jalǵyzbasty ata-analar talapqa saı kelmegeni úshin járdemaqy ala almaı otyr. Sondyqtan qoldanystaǵy júıeni jetildirý kerek ”, – dedi áleýmettanýshy Janar Jandosova.

Úkimet áleýmettik tólemderge 2-3 trıllıon qarajat qarastyryp jatsa, kedeılik deńgeıi de aıtarlyqtaı tómendeýi múmkin eken.