الەم جاڭالىقتارىجاڭالىقتار
قازاقستاندىق تاۋىق ەتىنەن قاۋىپتى باكتەريا انىقتالدى
فوتو: اشىق دەرەككوز
قازاقستاننان رەسەيگە جەتكىزىلەتىن تاۋىق ەتىنەن ولىمگە اكەلەتىن ليستەريا تابىلدى, دەپ حابارلايدى qandastar.kz
اۋىل شارۋاشىلىعى مينيسترلىگىنىڭ ۆەتەريناريالىق باقىلاۋ جانە قاداعالاۋ كوميتەتىنىڭ مالىمەتىنشە, 29 قاڭتاردا روسسەلحوزنادزور «ماكينسكايا پتيتسەفابريكا» جشس ونىمدەرىنە قاتىستى كۇشەيتىلگەن زەرتحانالىق باقىلاۋ ەنگىزىلگەن.
مۇنداي باقىلاۋ كەزىندە تاۋارلار ەاەو اۋماعىندا تاسىمالدانا الادى, بىراق ءاربىر پارتيا مىندەتتى تەكسەرۋدەن وتەدى.
«كوميتەت ءالى روسسەلحوزنادزوردان زەرتحانالىق زەرتتەۋلەردىڭ راستايتىن ناتيجەلەرىن العان جوق. ەاەو №94 ەرەجەسىنە سايكەس, ۋاكىلەتتى ورگاندار انىقتالعان زاڭبۇزۋشىلىقتار تۋرالى بارلىق مۇددەلى تاراپتاردى 10 جۇمىس كۇنى ىشىندە حاباردار ەتۋگە مىندەتتى. وسى جاعدايدىڭ سەبەپتەرىن انىقتاۋ ءۇشىن اقمولا وبلىستىق اۋماقتىق ينسپەكتسياسى كاسىپورىندا تەكسەرۋ جۇرگىزىپ, ءونىم ۇلگىلەرىن زەرتحانالىق تالداۋعا جىبەردى», – دەلىنگەن مينيسترلىكتىڭ حابارلاماسىندا.
