قازاقستاندىق ترانسگەندەر ايەلدەردىڭ دارەتحاناسىنا كىرىپ, باسى داۋعا قالدى

وقيعا استانا قالاسىنداعى سپورت زالداردىڭ بىرىندە بولعان. جاتتىعۋ زالىنا كەلۋشى ايەلدەردىڭ ءبىرى كيىم اۋىستىراتىن بولمەدەن ترانسگەندەر, بلوگەر نايل تۇرعانوۆتى (نيكا نەت) كەزدەستىرىپ قالعان. ءمان-جايدى ادۆوكات ارجان سادۋاقاسقا ايتىپ بەرگەن. زاڭ سالاسىنىڭ مامانى جەلىدە تارالعان وقيعاعا قاتىستى جەكە پاراقشاسىندا پىكىر ءبىلدىردى, دەپ حابارلايدى Skifnews.kz اقپارات پورتالى.

“جەكە قۇجاتتا جىنىسى قالاي كورسەتىلسە, سوعان ساي ارەكەت ەتۋ كەرەك. ەگەر ايەل دەپ تۇرسا, ول ايەل بولادى. ەركەك دەپ تۇرسا, ەركەك بولادى. جىنىسىن اۋىستىرسا دا, جەكە كۋالىكتە تۋعانداعى جىنىسى جازىلادى. مەنىڭ تانىسىمنىڭ دابىل قاققانى وتە ورىندى. ويتكەنى سپورت زالدارعا بالالار دا بارادى. ترانسگەندەردىڭ ءىس-ارەكەتى ەشقانداي قۇقىقتىق نورمالارعا نەمەسە مورالدىق قاعيدالارعا سايكەس كەلمەيدى. ايەلدەر شەشىنەتىن بولمە – ايەلدەر مەن قىزداردىڭ ءوزىن قاۋىپسىز سەزىنەتىن كەڭىستىگى. ەركەك بولىپ تۋعان ترانس ايەلدەردىڭ بولۋى ايەلدەرگە, اسىرەسە كىشكەنتاي قىزدارعا ىڭعايسىز بولۋى مۇمكىن”, – دەدى زاڭگەر.

الايدا ترانسگەندەر نيكا نەت مالىمدەمە جاساپ, بارلىق ايىپتاردى جوققا شىعاردى. ونىڭ ايتۋىنشا, ول كيىم اۋىستىراتىن بولمەگە بارماعان, سپورتزالعا تەك دارەتحانا ىزدەپ كىرگەن.

«الدىمەن, دەنساۋلىعىما بايلانىستى سپورت زالدارعا بارۋعا بولمايتىنىن ايتايىن. سول كۇنى از قامتىلعان وتباسىلار مەن جالعىزباستى انالارعا ازىق-ت ۇلىك ساتىپ الىپ ءجۇردىم. گارموندارعا اسەر ەتەتىن دارىلەر ءىشىپ جۇرگەندىكتەن, قاتتى اجەتحاناعا بارعىم كەلدى. ەڭ جاقىن ماڭدا جاتتىعۋ زالى تۇر ەكەن. مەن رۇقسات سۇراپ, ەشقانداي كەدەرگىسىز, جانجالسىز اجەتحاناعا كىرىپ شىقتىم. كيىم اۋىستىراتىن بولمە مەن اجەتحانا ەكەۋى ەكى جاقتا ورنالاسقان. بارلىق ەسىكتەر جابىق بولدى. مەن ءبىر مينۋتتا دارەتحاناعا كىرىپ, شىعىپ كەتتىم. سول كەزدە مەنى تانىپ, سۋرەتكە تۇسكىسى كەلەتىن وقىرماندارىمدى كوردىم. اراسىندا قايىرىمدىلىق جاساپ جۇرگەنىم ءۇشىن ءبىر-ەكى ايەل العىس ايتىپ تا ۇلگەردى. بار جاعداي وسى. مەن ايەلدەردىڭ كيىنەتىن بولمەسىنە كىرگەن جوقپىن. اقپاراتتىڭ ءبارى جالعان”, – دەدى بلوگەر.

ودان كەيىن زاڭگەردىڭ مالىمدەمەسىنە دە جاۋاپ بەردى.

«مەن زاڭدى تۇردە ايەلمىن. ءسىزدىڭ مۇنداي مالىمدەمە جاساۋعا قۇقىعىڭىز جوق. ايەلدەردىڭ كوز جاسى سونشالىقتى الاڭداتاتىن بولسا, تۇرمىستاعى زورلىق-زومبىلىق كورگەن ايەلدەر مەن كومەككە مۇقتاج جالعىزباستى انالاردىڭ ماسەلەسىن كوتەرىڭىز. بوس سوزبەن اينالىسۋدى دوعارىڭىز», – دەپ اشۋلاندى ترانسگەندەر.