Qazaqstandyq transgender áıelderdiń dárethanasyna kirip, basy daýǵa qaldy

Oqıǵa Astana qalasyndaǵy sport zaldardyń birinde bolǵan. Jattyǵý zalyna kelýshi áıelderdiń biri kıim aýystyratyn bólmeden transgender, bloger Naıl Turǵanovty (Nıka Net) kezdestirip qalǵan. Mán-jaıdy advokat Arjan Sádýaqasqa aıtyp bergen. Zań salasynyń mamany jelide taralǵan oqıǵaǵa qatysty jeke paraqshasynda pikir bildirdi, dep habarlaıdy Skifnews.kz aqparat portaly.

“Jeke qujatta jynysy qalaı kórsetilse, soǵan saı áreket etý kerek. Eger áıel dep tursa, ol áıel bolady. Erkek dep tursa, erkek bolady. Jynysyn aýystyrsa da, jeke kýálikte týǵandaǵy jynysy jazylady. Meniń tanysymnyń dabyl qaqqany óte oryndy. О́ıtkeni sport zaldarǵa balalar da barady. Transgenderdiń is-áreketi eshqandaı quqyqtyq normalarǵa nemese moraldyq qaǵıdalarǵa sáıkes kelmeıdi. Áıelder sheshinetin bólme – áıelder men qyzdardyń ózin qaýipsiz sezinetin keńistigi. Erkek bolyp týǵan trans áıelderdiń bolýy áıelderge, ásirese kishkentaı qyzdarǵa yńǵaısyz bolýy múmkin”, – dedi zańger.

Alaıda transgender Nıka Net málimdeme jasap, barlyq aıyptardy joqqa shyǵardy. Onyń aıtýynsha, ol kıim aýystyratyn bólmege barmaǵan, sportzalǵa tek dárethana izdep kirgen.

«Aldymen, densaýlyǵyma baılanysty sport zaldarǵa barýǵa bolmaıtynyn aıtaıyn. Sol kúni az qamtylǵan otbasylar men jalǵyzbasty analarǵa azyq-túlik satyp alyp júrdim. Garmondarǵa áser etetin dáriler iship júrgendikten, qatty ájethanaǵa barǵym keldi. Eń jaqyn mańda jattyǵý zaly tur eken. Men ruqsat surap, eshqandaı kedergisiz, janjalsyz ájethanaǵa kirip shyqtym. Kıim aýystyratyn bólme men ájethana ekeýi eki jaqta ornalasqan. Barlyq esikter jabyq boldy. Men bir mınýtta dárethanaǵa kirip, shyǵyp kettim. Sol kezde meni tanyp, sýretke túskisi keletin oqyrmandarymdy kórdim. Arasynda qaıyrymdylyq jasap júrgenim úshin bir-eki áıel alǵys aıtyp ta úlgerdi. Bar jaǵdaı osy. Men áıelderdiń kıinetin bólmesine kirgen joqpyn. Aqparattyń bári jalǵan”, – dedi bloger.

Odan keıin zańgerdiń málimdemesine de jaýap berdi.

«Men zańdy túrde áıelmin. Sizdiń mundaı málimdeme jasaýǵa quqyǵyńyz joq. Áıelderdiń kóz jasy sonshalyqty alańdatatyn bolsa, turmystaǵy zorlyq-zombylyq kórgen áıelder men kómekke muqtaj jalǵyzbasty analardyń máselesin kóterińiz. Bos sózben aınalysýdy doǵaryńyz», – dep ashýlandy transgender.