قازاقستاندىق جىگىت 2011 جىلى ءوزىن باسى داۋعا قالعان رەپەر P. Diddy قالاي اسىراپ العىسى كەلگەنىن ايتتى

فوتو: اشىق دەرەككوز

اتىشۋلى امەريكالىق رەپەر شون كومبس (P. Diddy) قازىرگى ۋاقىتتا سەكسۋالدىق قىلمىستارمەن ايىپتالىپ جاتىر.باق بەتتەرىندە ونىڭ 2011 جىلى الماتىداعى № 2 بالالار ۇيىنە كەلگەنى ايتىلعان ەدى. «يزۆەستيا» باسىلىمى ول بارعان بالالار ءۇيىنىڭ بۇرىنعى تاربيەلەنۋشىسىن تاۋىپ, ونىڭ شەتەلدىك جۇلدىزبەن كەزدەسۋى جايلى سۇراعان. بۇل تۋرالى Stan.kzاقپارات اگەنتتىگى حابارلايدى.

راحيم رۋشانوۆ قازىر 27 جاستا. جىگىت الماتىدا پاتەر جالدايدى, جازدا بارمەن, قىستا گاز قازاندىقتارىن جوندەۋ شەبەرى بولىپ جۇمىس ىستەيدى.

ول بالالار ۇيىنە التى جاسىندا كەلگەنىن ايتتى. P. Diddy الماتىداعا كەلگەندە ول 13 جاستا ەدى. مەكەمە قابىرعاسىندا قوناقتى ەرتىپ ءجۇرىپ تانىستىرۋ جۇمىسى راحيمعا تاپسىرىلعان.

«ونى قارسى الدىق. الدىمەن ەكسكۋرسيا جاساپ, بولمەلەردى, اۋماقتى, سپورت زالدى كورسەتتىك. بالالار ۇيىنە شاعىن رۋمتۋر وتكىزىلدى. ودان كەيىن اكت زالىنا باردىق, ءبىر ساعاتتاي كونتسەرت بولدى. كەيىن ول قولتاڭبا بەرىپ جاتتى. ول مەنى ۇنەمى قولىمنان ۇستاپ ءجۇردى. بۇل مەن ۇشىن ماقتاۋ سياقتى كورىنەتىن. بىردە ارقامنان سيپاپ, بىردە ارقامنان قاعىپ, ‘thank you’ دەپ, تاعى ءبىر نارسە ايتتى», – دەپ ەسكە الدى رۋشانوۆ.

بالانىڭ مۋزىكانتتىڭ ءسوزىن تۇسىنبەگەن, سەبەبى ول اعىلشىن ءتىلىن بىلمەيتىن. رۋشانوۆقا تەك ءبىر عانا ءسوزدى اۋدارعان, ياعني ارتىستىڭ ونى بالالار ۇيىنەن الىپ كەتكىسى كەلەتىنىن ايتقان.

«ول اعىلشىن تىلىندە سويلەدى. ماعان اۋدارىلعان جالعىز سويلەم: «ول سەنى وزىمەن بىرگە الىپ كەتكىسى كەلەدى». سودان كەيىن بۇل تاقىرىپ شامامەن ءبىر اي بويى قوزعالىپ جۇردى. ءبىر ساتتە ۇمىتتەنە باستادىم. مەن بالالار ءۇيىنىڭ بالاسىمىن, ال امەريكاندىق جۇلدىز مەنى امەريكاعا الىپ كەتكىسى كەلەدى. ول كەزدە مۇندايدى ەستۋ باقىت ەدى. بىراق اقىرىندا مەنى اسىراپ الۋ مۇمكىن بولمادى, سەبەبى, ماعان ايتقانداي, ول تەك مەنى عانا العىسى كەلگەن, ال بالالار ۇيىندە مەنىڭ اپكەلەرىم بار ەدى», – دەپ اڭگىمەلەدى بۇرىنعى بالالار ءۇيىنىڭ تاربيەلەنۋشىسى.

الايدا بالالار ءۇيىنىڭ بۇرىنعى ديرەكتورى اقمارال شاتاەۆا, P.Diddy ءوز ساپارى كەزىندە بالانى اسىراپ الۋعا شىنايى قىزىعۋشىلىق بىلدىرگەن بە دەگەن سۇراققا: «قايداعى! ونداي بولعان جوق» دەپ تاڭدانىپ جاۋاپ بەردى. ونىڭ پىكىرىنشە, بۇل بىرەۋدىڭ قالجىڭى بولۋى مۇمكىن.

«راحيم ءوزى قارا تورى بالا عوي. سول كەزدە, مۇمكىن, بىرەۋ جاي عانا قالجىڭداعان شىعار. ال شىن مانىندە ونداي بولمادى. مەن ەسىمدە ساقتاپ قالار ەدىم. ونداي بولۋى مۇمكىن ەمەس. سىزگە سەنىمدى ايتامىن, ول بالانى اسىراپ العىسى كەلەتىندەي قىزىعۋشىلىق بولماعان», – دەدى ول.

بۇرىنعى ديرەكتوردىڭ پىكىرىنشە, جۇلدىزدىڭ بالالار ۇيىنە كەلۋى ونىڭ ساپارىنىڭ قايىرىمدىلىق ماقساتىن كورسەتۋ ءۇشىن قاجەت بولعان. رەپەر بالالارعا ءوزىنىڭ مۋزىكالىق ديسكىلەرى, تەلەديدارلار جانە كەپكەلەر اكەلدى, بۇل تۋرالى سول كەزدە باق جازعان.

مەكەمە كوپتەن بەرى جابىلعان, بىراق شاتاەۆا سول كەزدەگى تاربيەلەنۋشىلەر مەن ۇجىمدى قازىرگى ۋاقىتتا رەپەردىڭ قارا نيەتتى ارەكەتىمەن بايلانىستىراتىنىنا قىنجىلتاتىنىن اتاپ ءوتتى.

«بىزدەگى بالالار ۇيىنەن شەتەلدىكتەر بالالاردى اسىراپ العىسى كەلدى دەگەن اڭگىمە مۇلدەم بولعان ەمەس. ءبىزدىڭ تاربيەلەنۋشىلەرىمىزگە دە, قىزمەتكەرلەرىمىزگە دە قازىرگى ۋاقىتتا بالالاردى ساتىپ جىبەردى دەگەن اڭگىمەلەردى ەستۋ وتە اۋىر. بالالار — تاۋار ەمەس, ولاردى ساتۋعا بولمايدى. ءبىلىم مينيسترلىگىنە نەمەسە سىرتقى ىستەر مينيسترلىگىنە سۇراۋ سالساڭىزدار, بالالاردىڭ قانشا رەت شەتەلگە شىعارىلعانىن كورەسىزدەر», – دەپ اشۋلاندى بۇرىنعى ديرەكتور.

ەسكە سالا كەتسەك, P. Diddy لاقاپ اتىمەن تانىلعان, رەپەر جانە پروديۋسەر شون كومبسپەن بوپسالاۋ, ادام ساۋداسى جانە سەكسۋالدى قۇلدىققا سالۋ ايىپتارى بويىنشا قاماۋعا الىنعان ەدى. وسى ەلدى ءدۇر سىلكىندىرگەن جاڭالىقتان سوڭ ونىڭ 2011 جىلدارى قازاقستانعا كەلگەن مۇراعاتتىق ۆيدەولارى پايدا بولادى.