قازاقستاندىقتار بەس كۇن بويى اقشا اۋدارا الماۋى مۇمكىن: بۇعان نە سەبەپ?

فوتو: gov.kz

قازاقستاندا 2026 جىلدان باستاپ بانكتەر, تولەم جۇيەلەرى مەن ۇيالى بايلانىس وپەراتورلارى كۇماندى دەپ تاپقان قارجى اۋدارىمدارىن بەس جۇمىس كۇنىنە دەيىن بۇعاتتاي الادى, دەپ حابارلايدى qandastar.kz Dalanews.kz-كە سىلتەمە جاساپ.

مۇنداي تالاپ 2025 جىلدىڭ 30 ماۋسىمىندا قول قويىلعان «تولەمدەر جانە تولەم جۇيەلەرى تۋرالى» زاڭعا ەنگىزىلگەن وزگەرىستەردە كورسەتىلگەن. بۇعان دەيىن كۇماندى ترانزاكتسيالار ەڭ كوپ دەگەندە ءۇش كۇنگە بۇعاتتالىپ كەلگەن.

جاڭا ەرەجەگە سايكەس, بانكتەر مەن قارجى ۇيىمدارى قانداي دا ءبىر ترانزاكتسيادان الاياقتىق بەلگىلەرىن بايقاسا, ول وپەراتسيانى دەرەۋ توقتاتىپ, كليەنتتەن تۇسىنىكتەمە تالاپ ەتۋگە قۇقىلى. ەگەر پايدالانۋشى قارجىنىڭ زاڭدى ەكەنىن دالەلدەي الماسا, ونىڭ ەسەپشوتى نەمەسە ەلەكتروندى ءاميانى تولىقتاي انىق-قانىعى بەلگىلى بولعانعا دەيىن بۇعاتتا تۇرادى.

ەگەر كليەنت وپەراتسيانىڭ زاڭدىلىعىن راستايتىن اقپاراتتى ۇسىنسا, بۇعاتتالعان قاراجات دەرەۋ اشىلادى. ال اۋدارىم شىنىمەن دە الاياقتىق ارەكەت بولىپ شىقسا, كليەنتتىڭ دەرەكتەرى قۇقىق قورعاۋ ورگاندارىنا بەرىلەدى. سونداي-اق, بۇل پايدالانۋشى «كۇدىكتى وپەراتسيالار» تۋرالى ارنايى بازاعا تىركەلەدى.