جاڭالىقتار
قازاقستاندىقتار دەكلاراتسيا تاپسىرمايتىن بولدى
فوتو: اشىق دەرەككوز
جاقىندا پرەزيدەنت قاسىم-جومارت توقاەۆ ازاماتتاردى جاپپاي دەكلاراتسيا تاپسىرۋعا مىندەتتەۋگە قاتىستى پىكىر ءبىلدىردى. مەملەكەت باسشىسى اۋقىمدى جۇمىستاردان سوڭ كەلەر جىلى ازاماتتاردى دەكلاراتسيا تاپسىرۋعا مىندەتتەۋ باستاماسىن قايتا قاراۋ قاجەتتىگىن مەڭزەدى. ۇكىمەت تە دەر كەزىندە ارەكەت ەتىپ, بۇگىن 2025 جىلى جەكە تۇلعالار مىندەتتى تۇردە دەكلاراتسيا تاپسىرۋدان بوساتىلاتىنى حابارلاندى, دەپ جازادى qandastar.kz
«پرەزيدەنت جاپپاي دەكلاراتسيالاۋ تاسىلدەرىن قايتا قاراۋدى تاپسىردى. قازىر دەكلاراتسيانى 4 ملننان اسا ادام تاپسىرادى. ولاردىڭ ىشىندە مەملەكەتتىك قىزمەتكەرلەر, كۆازيمەملەكەتتىك سەكتور مەن بيزنەس وكىلدەرى بار. 2025 جىلى ازاماتتاردىڭ قالعان بارلىق ساناتى دا دەكلاراتسيا تاپسىرادى دەپ جوسپارلانعان. وعان حالىق الاڭداۋشىلىق ءبىلدىردى. سوندىقتان اتالعان ماسەلەگە مەملەكەت باسشىسى ءوزىنىڭ نازارىن اۋداردى», – دەدى پرەمەر-مينيستر ولجاس بەكتەنوۆ.
ونىڭ ايتۋىنشا, قازىر مەملەكەتتىك ورگانداردىڭ بازاسى بارىنشا تسيفرلاندىرىلعان, قارجىلىق جانە ۆاليۋتالىق باقىلاۋ كۇشەيتىلدى.
«حالىقارالىق كەلىسىمدەر شەڭبەرىندە شوتتار بويىنشا دەرەكتەر الماسۋ جولعا قويىلدى. تسيفرلىق قىزمەتتەر كورسەتۋ كەڭ تارالعان. سوندىقتان جالپى العاندا جەكە تۇلعالاردىڭ اكتيۆتەرى بويىنشا بارلىق اقپارات بار. قارجى جانە تسيفرلاندىرۋ مينيسترلىكتەرى تىركەۋ جانە سالىقتىق باقىلاۋ ءۇشىن بارلىق تسيفرلىق بازادان, ونىڭ ىشىندە ەكىنشى دەڭگەيلى بانكتەردەن مالىمەتتەر الۋدى قامتاماسىز ەتكەنى ءجون», – دەدى پرەمەر-مينيستر.
وسىنى نەگىزگە الا كەلە ۇكىمەت جەكە تۇلعالاردى دەكلاراتسيا تاپسىرۋدان بوساتۋ كەرەك دەگەن ۇستانىمعا كەلگەن.
«سوندىقتان مەن 2025 جىلى ازاماتتاردىڭ قالعان ساناتتارىن اكتيۆتەر تۋرالى دەكلاراتسيانى مىندەتتى تۇردە تاپسىرۋدان بوساتۋ تۋرالى قارجى مينيسترلىگىنىڭ ۇسىنىسىن قولدايمىن. وسىعان بايلانىستى قارجى مينيسترلىگى ۇلتتىق ەكونوميكا, ادىلەت مينيسترلىكتەرىمەن بىرگە 3 كۇن ىشىندە قاجەت زاڭنامالىق تۇزەتۋلەر ازىرلەپ پارلامەنتكە ءتيىستى جۇمىستى جۇرگىزۋى كەرەك», – دەدى ۇكىمەت باسشىسى.
