Qazaqstandyqtar quqyq qorǵaý júıesine senedi, shýdyń bárin kóteretin jýrnalıster – Depýtat

Foto: ashyq derekkóz

Senat depýtaty Marat Qojaev halyqtyń quqyq qorǵaý júıesine senetinin, el arasynda shý shyǵaryp, daýryqtyratyn jýrnalıster ekenin aıtty. Bul týraly qandastar.kz Stan.kz aqparat agenttigine silteme jasap habarlaıdy.

Májilis alańynda tilshi depýtat Marat Qojaevtan 6 aı boıy seksýaldyq quldyqta ustaǵan qyzylordalyq oqýshynyń isi qalaı júrip jatqanyn surady. BAQ ókili istiń qupııalyǵyna baılanysty qoǵam kináliler jazadan qutylyp ketedi dep qorqatynyn jetkizdi.

“Qoǵamda ondaı qorqynysh joq. Aqparattyq resýrstaǵy jaǵdaıdy daýryqtyryp jatqan sizder, jýrnalıster. Halyqtyń basym kópshiligi elimizdiń quqyqtyq júıesine senedi dep oılaımyn. Jýrnalıster “shý kótersek is muqııat qaralady” dep oılaıdy”, – deıdi Marat Qojaev.

Alaıda depýtat munyń bekershilik ekenin aıtty.

“Sotta tek proessýaldy dálelder ǵana qaralady. Sizderdiń áleýmettik jelide daýryǵyp, shý kótergenderińiz eskerilmeıdi. Aıǵaqtar rastalǵan jaǵdaıda kináli adam ózine laıyqty jazasyn alady”, – deıdi depýtat.

Marat Qojaev Talǵardaǵy 16 jastaǵy jasóspirimniń jantúrshigerlik ólimine qatysty Qazaqstanda qylmys órshýi týraly suraqqa jaýap berdi. Depýtat statıstıkaǵa júginýge keńes beredi.

“Siz qala kóshelerinde táýliktiń kez kelgen ýaqytynda serýendeı alasyz, kez kelgen qoǵamdyq oryndardy aralaısyz. Sizder birjerde shekten tys tártipsizdik bolǵanyn baıqadyńyzdar ma?” – dedi Marat Qojaev suraqqa suraqpen jaýap berip.

Buǵan deıin depýtat Qazaqstanda qylmys jasaǵandarǵa zań onsyz da qatal ekenin aıtqan edi.