قازاقستاندىقتار پويىزدى سارقىت تاسۋ ءۇشىن قولدانادى — ساۋرانباەۆ

Talgo ءوندىرىسى توقتاعان

2022 جىلدان باستاپ قازاقستاندا يسپان-قازاقستاندىق Talgo پويىزدارىن شىعارۋ توقتاتىلعانى بەلگىلى بولدى. بۇعان دەيىن قولدانىستاعى ۆاگوندار پايدالانۋ مەرزىمى بىتكەنشە قاتىناي بەرەدى دەپ حابارلانعان بولاتىن. «قازاقستان تەمىر جولى» مالىمەتىنشە, بۇل شامامەن 2040 جىلعا دەيىن جالعاسادى. ال العاشقى قۇرام – 2003 جىلى ىسكە قوسىلعان پويىز – قازىردىڭ وزىندە پايدالانۋدان شىعارىلدى.

Ulysmedia.kz جازعانداي, Talgo-دان باس تارتۋدى تۇسىندىرگەن مينيستر بۇل پويىزداردىڭ قازاقستان جاعدايىنا بەيىمدەلمەگەنىن جاسىرمادى.

– بۇل ۆاگوندار الماتى مەن استانا اراسىندا جوعارى جىلدامدىقپەن جۇرۋگە ارنالعان. ارنايى اسپاسى بار, 160 شاقىرىمعا دەيىن جۇرە الادى. سول ءۇشىن ءسال تار ەتىپ جاسالعان. ماقسات – ادامداردى جىلدام جەتكىزۋ. ءبىز باستاپقىدا الماتى مەن استانا اراسىن 11 ساعاتقا دەيىن قىسقارتتىق. بىراق بىزدە جۇك پويىزدارى مەن جولاۋشىلار پويىزدارى ءبىر جولمەن جۇرەدى, جولداردىڭ جاعدايى دا ناشار. سونىڭ سالدارىنان قازىر بۇل پويىزدار 18–21 ساعات جۇرەدى. بۇل, شارتتى تۇردە ايتقاندا, «جامان جولداعى مەرسەدەس», – دەدى ساۋرانباەۆ.

حالىقتىڭ سۇرانىسىنا قاراي

ءمينيستردىڭ ايتۋىنشا, قازاقستاندىقتار پويىزدى كوبىنە ۇشاقپەن الىپ جۇرە المايتىن زاتتاردى جەتكىزۋ ءۇشىن پايدالانادى.

– ماسەلەن, اجەلەر جولعا شىققاندا ەت, قازى, شۇبات سەكىلدى تاعامدارىن الادى. ولاردى ۇشاققا سالا المايدى. ياعني پويىز – «ازىق-ت ۇلىك پويىزى» ىسپەتتەس. اجەلەر نەمەرەلەرىنە سارقىت اپارادى, ول جاقتان دا بىردەڭە الىپ كەلەدى. سوندىقتان ءبىز ءۇشىن ۆاگون – الەۋمەتتىك باعدارلامانىڭ ءبىر بولىگى. سول سەبەپتى حالىق كەڭ ۆاگون, مىندەتتى تۇردە رۋندۋك بولعانىن قالايدى, – دەپ ءتۇسىندىردى مينيستر.

وسىعان بايلانىستى 2022 جىلدان باستاپ Talgo قۇراستىرىلىپ كەلگەن زاۋىتتا ەندى Stadler ۆاگوندارى شىعارىلا باستادى. ءمينيستردىڭ ايتۋىنشا, ولار ستاندارتتى ولشەمدە, وتە قولايلى. جىل سوڭىنا دەيىن جاڭا ۆاگوندار كەيبىر باعىتتارعا قويىلادى. جۋرناليستەر: «قازاقستان Talgo-دان اجەلەر ۆاگوندى ازىق-ت ۇلىككە تولتىراتىنى ءۇشىن باس تارتتى ما?» دەپ سۇراعاندا, ساۋرانباەۆ ناقتى جاۋاپ بەرمەدى. دەگەنمەن ۇزاقمەرزىمدى شەشىم دۇرىس ەكەنىن, جاڭا Stadler ۆاگوندارىنا العاش مىنگەندە جۇرتشىلىق ونىڭ پايداسىن تۇسىنەتىنىن اتاپ ءوتتى.

ءالسىز تۇسى

سونىمەن قاتار, نەمىستىڭ قىمبات ۆاگوندارىنىڭ ءبىر «ءالسىز تۇسى» بارى بەلگىلى بولدى: ۆاگونداردىڭ اراسىنا قويىلاتىن ديزەل-گەنەراتور قۇرامدى جىلۋمەن جانە وزگە دە قاجەتتىلىكتەرمەن قامتاماسىز ەتەدى.

– بىراق ول ديزەل بارلىق جابدىقتان بۇرىن ىستەن شىعادى. قازىر ءبىزدىڭ ينجەنەرلەر وسى ماسەلەنى شەشۋمەن اينالىسىپ جاتىر, – دەدى ساۋرانباەۆ.