Jańalyqtar
Qazaqstandyqtar poıyzdy sarqyt tasý úshin qoldanady — Saýranbaev
Kólik mınıstri Nurlan Saýranbaev qazaqstandyqtardyń kóp jylǵy synyn moıyndap, Talgo júrdek poıyzdarynyń elimizge onsha saı kelmeıtinin aıtty, dep habarlaıdy qandastar.kz
Talgo óndirisi toqtaǵan
2022 jyldan bastap Qazaqstanda ıspan-qazaqstandyq Talgo poıyzdaryn shyǵarý toqtatylǵany belgili boldy. Buǵan deıin qoldanystaǵy vagondar paıdalaný merzimi bitkenshe qatynaı beredi dep habarlanǵan bolatyn. «Qazaqstan temir joly» málimetinshe, bul shamamen 2040 jylǵa deıin jalǵasady. Al alǵashqy quram – 2003 jyly iske qosylǵan poıyz – qazirdiń ózinde paıdalanýdan shyǵaryldy.
Ulysmedia.kz jazǵandaı, Talgo-dan bas tartýdy túsindirgen mınıstr bul poıyzdardyń Qazaqstan jaǵdaıyna beıimdelmegenin jasyrmady.
– Bul vagondar Almaty men Astana arasynda joǵary jyldamdyqpen júrýge arnalǵan. Arnaıy aspasy bar, 160 shaqyrymǵa deıin júre alady. Sol úshin sál tar etip jasalǵan. Maqsat – adamdardy jyldam jetkizý. Biz bastapqyda Almaty men Astana arasyn 11 saǵatqa deıin qysqarttyq. Biraq bizde júk poıyzdary men jolaýshylar poıyzdary bir jolmen júredi, joldardyń jaǵdaıy da nashar. Sonyń saldarynan qazir bul poıyzdar 18–21 saǵat júredi. Bul, shartty túrde aıtqanda, «jaman joldaǵy Mersedes», – dedi Saýranbaev.
Halyqtyń suranysyna qaraı
Mınıstrdiń aıtýynsha, qazaqstandyqtar poıyzdy kóbine ushaqpen alyp júre almaıtyn zattardy jetkizý úshin paıdalanady.
– Máselen, ájeler jolǵa shyqqanda et, qazy, shubat sekildi taǵamdaryn alady. Olardy ushaqqa sala almaıdy. Iaǵnı poıyz – «azyq-túlik poıyzy» ispettes. Ájeler nemerelerine sarqyt aparady, ol jaqtan da birdeńe alyp keledi. Sondyqtan biz úshin vagon – áleýmettik baǵdarlamanyń bir bóligi. Sol sebepti halyq keń vagon, mindetti túrde rýndýk bolǵanyn qalaıdy, – dep túsindirdi mınıstr.
Osyǵan baılanysty 2022 jyldan bastap Talgo qurastyrylyp kelgen zaýytta endi Stadler vagondary shyǵaryla bastady. Mınıstrdiń aıtýynsha, olar standartty ólshemde, óte qolaıly. Jyl sońyna deıin jańa vagondar keıbir baǵyttarǵa qoıylady. Jýrnalıster: «Qazaqstan Talgo-dan ájeler vagondy azyq-túlikke toltyratyny úshin bas tartty ma?» dep suraǵanda, Saýranbaev naqty jaýap bermedi. Degenmen uzaqmerzimdi sheshim durys ekenin, jańa Stadler vagondaryna alǵash mingende jurtshylyq onyń paıdasyn túsinetinin atap ótti.
Álsiz tusy
Sonymen qatar, nemistiń qymbat vagondarynyń bir «álsiz tusy» bary belgili boldy: vagondardyń arasyna qoıylatyn dızel-generator quramdy jylýmen jáne ózge de qajettiliktermen qamtamasyz etedi.
– Biraq ol dızel barlyq jabdyqtan buryn isten shyǵady. Qazir bizdiń ınjenerler osy máseleni sheshýmen aınalysyp jatyr, – dedi Saýranbaev.
