جاڭالىقتار
قازاقستاندىقتار شەنگەن ۆيزاسىن الۋ ءۇشىن جالعان قۇجات تاپسىرعان
قازاقستاندىقتار شەنگەن ۆيزاسىن الۋ ءۇشىن جالعان قۇجات ۇسىنۋدى جيىلەتكەن. بۇل – ەۋروپا ەلدەرى كونسۋلدارىنىڭ بەرگەن اقپاراتى.
جاعىمسىز فاكتىلەر ءوز كەزەگىندە قۇجات راسىمدەۋ مەرزىمىنىڭ ۇزارىپ, ءتىپتى ۆيزا بەرۋدەن باس تارتۋ جاعدايلارىنىڭ ارتۋىنا اسەر ەتىپ وتىر. بۇل جايىندا ەلىمىزدىڭ سىرتقى ىستەر مينيسترلىگىنىڭ رەسمي وكىلى ايبەك سمادياروۆ بريفينگتە مالىمدەدى. بۇگىندە مينيسترلىك ەۋروپالىق وداق وكىلدەرىمەن ۆيزالىق رەجيمدى جەڭىلدەتۋ بويىنشا جۇمىستى جالعاستىرىپ جاتىر.
رەسمي وكىل ازاماتتارىمىزعا قاجەتتى قۇجاتتاردى ۇسىنۋ, ۆيزاعا ءوتىنىش بەرۋ, سونداي-اق الىمداردى تولەۋ پروتسەسىن مۇقيات باقىلاۋعا شاقىردى. ايبەك سمادياروۆ, قر سىرتقى ىستەر مينيسترلىگىنىڭ رەسمي وكىلى: — ۆيزا الۋ ءۇشىن جالعان فاكتىلەرى بار قۇجاتتاردى ۇسىنۋ قر يميدجىنە ەلەۋلى زيان كەلتىرىپ, ۆيزالىق رەجيمدى ليبەراليزاتسيالاۋ بويىنشا كەلىسسوزدەردى جۇرگىزۋدى قيىنداتادى. سونداي-اق بولاشاقتا ۆيزادان باس تارتۋ مۇمكىندىگىن ارتتىرا وتىرىپ, ازاماتتارىمىزدىڭ ۆيزالىق تاريحىن ناشارلاتادى. مۇنداي ۇسىنىلعان قۇجاتتار ولاردى مۇقيات تەكسەرۋ قاجەتتىلىگىنە بايلانىستى ۆيزالىق وتىنىشتەردىڭ قاراۋ مەرزىمىن ۇزارتادى جانە ناتيجەسىندە ازاماتتاردىڭ ۆيزانى كەشىكتىرۋ تۋرالى شاعىمدارى جيىلەپ كەتەدى.
