قازاقستاندىقتار شەتەلگە 789 ميلليارد تەڭگە جىبەرگەن

فوتو: اشىق دەرەككوز

بۇل تۋرالى ۇلتتىق بانكتىڭ 2024 جىلعا جاساعان قورىتىندىسىنان بەلگىلى بولدى, دەپ حابارلايدى qandastar.kz

2024 جىلى حااج (حالىقارالىق اقشا اۋدارىمدارى جۇيەسى) ارقىلى جۇرگىزىلگەن اقشا اۋدارىمدارىنىڭ جيىنتىق كولەمى 1,05 ترلن تەڭگە بولدى. بۇل 2023 جىلعى كورسەتكىشتەن 21%-عا تومەن.

شوت اشپاستان حااج ارقىلى جۇرگىزىلگەن بارلىق وپەراتسيانىڭ 97%-ى قازاقستان مەن باسقا ەلدەردىڭ اراسىنداعى ترانسشەكارالىق اۋدارىمدارعا تيەسىلى.

شەتەلگە جىبەرىلگەن اقشا اۋدارىمدارىنىڭ كولەمى – 788,9 ملرد تەڭگە نەمەسە حااج ارقىلى جۇرگىزىلگەن ترانسشەكارالىق اۋدارىمداردىڭ جيىنتىق كولەمىنىڭ 77%-ى.

حااج ارقىلى جۇرگىزىلگەن وسى اۋدارىمداردى الۋشى نەگىزگى ەلدەر – وزبەكستان (29,7%), رەسەي (29,4%), تۇركيا (19,8%), گرۋزيا (6,8%) جانە قىرعىزستان (3,7%). بۇل اۋدارىمداردىڭ شامامەن 83%  «زولوتايا كورونا» جۇيەسى ارقىلى جۇرگىزىلگەن.

شەتەلدەن الىنعان اقشا اۋدارىمدارىنىڭ كولەمى – 236,8 ملرد تەڭگە نەمەسە حااج ارقىلى جۇرگىزىلگەن ترانسشەكارالىق اۋدارىمداردىڭ جيىنتىق كولەمىنىڭ 23%-ى. شەتەلدەن قازاقستانعا جاسالعان ءبىر اۋدارىمنىڭ ورتاشا سوماسى 300,6 مىڭ تەڭگە بولدى.

حااج ارقىلى جۇرگىزىلگەن وسى اۋدارىمداردى جىبەرۋشى نەگىزگى ەلدەر – رەسەي (26,1%), اقش (13,7%), وڭتۇستىك كورەيا (10,3%), وزبەكستان (10,0%) جانە تۇركيا (8,6%). وپەراتسيالاردىڭ 81%-دىق ۇلەسى «زولوتايا كورونا» جانە «ۆەستەرن يۋنيون» تولەم جۇيەلەرىنە تيەسىلى.

حالىقارالىق اقشا اۋدارىمدارى جۇيەسى بانكتىك شوت اشپاي-اق اۋدارىم جاساۋ ءۇشىن پايدالانىلاتىنىن اتاپ وتەمىز. نەگىزىنەن, بۇل اۋدارىمدار جەكە تۇلعالار اراسىنداعى وتەۋسىز اۋدارىم سيپاتىندا بولادى, — دەلىنگەن ۇلتتىق بانك حابارلاماسىندا.