قازاقستاندىقتار تاڭعى 8-دەن جۇمىسقا شىعادى

فوتو: اشىق دەرەككوز

ەندى وڭىرلەردە ءماسليحات دەپۋتاتتارى جۇمىس كەستەلەرىن تۇزەتۋ ارقىلى جۇمىس ۋاقىتىن وڭتايلاندىرۋ جونىندەگى باستامانى قولعا الدى. بۇل تۋرالى ساۋدا جانە ينتەگراتسيا ءمينيسترى ارمان شاققاليەۆ ۇكىمەت وتىرىسىندا مالىمدەدى, دەپ جازدى  qandastar.kz

ءمينيستردىڭ ايتۋىنشا, بۇل شارالار كاسىبي جانە جەكە ءومىر اراسىنداعى تەپە-تەڭدىكتى ساقتاۋعا, حالىققا قولايلى جاعداي جاساۋعا باعىتتالعان.

«بۇگىندە شقو-نىڭ قاتونقاراعاي, مارقاكول, ۇلكەن نارىن, زايسان, تارباعاتاي, سامار, كۇرشىم سەكىلدى بىرقاتار اۋدانىندا جۇمىس كەستەسى وزگەردى. ساعات 8:00-دەن 17:30-عا دەيىن تۇزەتىلىپ, تۇرعىندار تاراپىنان قولداۋ تاپتى. قاجەت بولعان جاعدايدا وسىنداي تاجىريبەنى جەرگىلىكتى اتقارۋشى ورگاندار باسقا وڭىرلەردە قولدانادى», – دەدى ارمان شاققاليەۆ.

ەسكە سالايىق, 5 قاڭتاردان باستاپ قاتونقاراعاي اۋدانىنىڭ 17 اۋىلى جۇمىس كۇنىن 08:00-دە باستاپ, 17:30-دا اياقتايتىن «جەكە» جۇمىس كەستەسىنە كوشتى, ال 24 اقپاننان باستاپ مارقاكول جانە ۇلكەن نارىن اۋداندارىنىڭ تۇرعىندارى دا وسى تارتىپكە ءوتتى.

5 ناۋرىزدان باستاپ زايسان, كۇرشىم, تارباعاتاي جانە سامار اۋداندارىنىڭ تۇرعىندارى دا جۇمىس كۇنىن ءبىر ساعات ەرتەرەك باستايتىنى بەلگىلى بولدى.