قازاقستاندىقتار ۇبت سەرتيفيكاتتارىن قولدان جاساپ كوميسسياعا تاپسىرعان

فوتو: مينيسترلىك

ەلىمىزدىڭ عىلىم جانە جوعارى ءبىلىم مينيسترلىگى قازاقستاندىقتار اراسىندا جالعان ۇبت سەرتيفيكاتتارىن جاساۋ ارەكەتى ورىن العانىن ەسكەرتتى. بۇل تۋرالى Stan.kz اقپارات اگەنتتىگى حابارلايدى.

مينيسترلىكتىڭ مالىمەتىنشە, قازىرگى ۋاقىتتا گرانت كونكۋرسىنا قۇجاتتار قابىلدانۋدا جانە قابىلداۋ كوميسسيالارىنا جالعان سەرتيفيكاتتار ۇسىنۋ بويىنشا 10-نان استام ارەكەت تىركەلگەن.

“قۇرمەتتى تالاپكەرلەر مەن اتا-انالار! بۇگىن نازارلارىڭىزدى ۇبت سەرتيفيكاتتارىن قولدان جاساۋ ارەكەتى تاقىرىبىنا اۋدارعىمىز كەلەدى. ۇبت سەرتيفيكاتىن قولدان جاساۋ مۇمكىن ەمەس ەكەنىن ەسكەرۋ ماڭىزدى. ءاربىر سەرتيفيكاتتا ونىڭ تۇپنۇسقالىعىن بىردەن تەكسەرۋگە مۇمكىندىك بەرەتىن بىرەگەي QR كودى بار. سونداي-اق, ۇبت سەرتيفيكاتى رەسمي قۇجات بولىپ تابىلادى. ونى قولدان جاساۋ قىلمىستىق كودەكستىڭ 385-بابى بويىنشا قىلمىستىق جاۋاپكەرشىلىككە اكەپ سوعادى”, – دەلىنگەن حابارلامادا.

دەرەكتەرگە سۇيەنسەك جالعان سەرتيفيكاتتا QR-كود اشىلمايدى جانە ساندار ءار ءتۇرلى شريفتپەن, ءار ءتۇرلى كولەمدە جازىلعان.

“سەرتيفيكاتتاردى قولدان جاساۋعا تىرىسۋدىڭ بارلىق جاعدايى ءتيىستى شارالار قابىلداۋ ءۇشىن قۇقىق قورعاۋ ورگاندارىنا جولدانادى. ەستەرىڭىزگە سالا كەتەيىك, ۇبت سەرتيفيكاتى app.testcenter.kz سايتىندا جەكە كابينەتتە, certificate.testcenter.kz سايتىندا جانە eGov ەلەكتروندىق ۇكىمەت پورتالىندا قولجەتىمدى”,- دەلىنگەن مينيسترلىك جازباسىندا.

ۆەدومستۆو ازاماتتاردى زاڭ بۇزۋشىلىققا بارماۋعا شاقىرىپ, مۇنىڭ سوڭى اۋىر سالدارعااكەپ سوعاتىنىن ەسكەرتتى.