Qazaqstandyqtar jyljymaıtyn múliktiń tehnıkalyq pasportyn onlaın ala alady

Jyljymaıtyn múlik ıeleri budan bylaı nysandarynyń (páterler, jataqhana bólmeleri, jeke garajdar men saıajaılar) tehnıkalyq pasportynyń elektrondy nusqasyn onlaın rásimdeı alady. ıfrlyq jańashyldyqty «Azamattarǵa arnalǵan úkimet» pen «Ulttyq aqparattyq tehnologııalar» júzege asyryp otyr, – dep habarlaıdy Tengrinews.kz tilshisi.

«HQO-ǵa barmaı-aq, tehpasportty alýdyń onlaın balamasy múlik ıeleriniń ýaqyty men qarjysyn únemdeýge múmkindik beredi. Buǵan deıin jyljymaıtyn múliktiń qujatyn alý úshin HQO-ǵa baryp, tehnıkalyq pasportqa qaǵaz júzinde ótinish berý kerek edi. Keıin múlik ıesi daıyn bolǵan qujatty alý úshin qaıtadan halyqqa qyzmet kórsetý ortalyǵyna baratyn», – deıdi «Azamattarǵa arnalǵan úkimettiń» basqarma tóraıymy Ásemgúl Baltasheva.

Budan bylaı tehnıkalyq qujatqa onlaın ótinish berip, daıyn úlgisin egov.kz elektrondy úkimet portalynan kóshirip alýǵa bolady. Bul úshin jyljymaıtyn múlik ıesiniń EQ-sy men quqyq belgileıtin qujatynyń biriniń (satý-satyp alý kelisimsharty, syıǵa berý sharty, jekeshelendirý sharty, sot sheshimi jáne t.b.) skan kóshirmesi bolýy kerek. Bastapqy tólem júrgizilgennen keıin jyljymaıtyn múlik ıesi elektrondy qujattyń kelgenin jeke kabınetinen kóre alady. Joba iske qosylǵan birneshe kúnniń ishinde onlaın túrde kelip túsken 100-den astam ótinish óńdelgen.

Aıta keteıik, jeke kabınetke kelgen elektrondy tehpasportty júktep alý úshin jyljymaıtyn múlik ıesi qyzmettiń naqty qunynyń aıyrmasyn tólegeni týraly túbirtekti qosa kórsetýi tıis. Tek sodan keıin ǵana qyzmet kórsetýshige arnaıy kod-habarlama joldanyp, tehpasportty kóshirip alýǵa ruqsat beriledi. Tehnıkalyq pasporttyń elektrondy úlgisiniń kúshi HQO-da mór basylyp beriletin tólqujatpen teń bolady.

Jyljymaıtyn múlik tólqujatyn elektrondy túrde ázirge Nur-Sultan jáne Shymkent qalalarynyń turǵyndary ala alady. Pılottyq joba 2020 jyldyń aqpanyna deıin jalǵasady.