قازاقستاندىقتاردان مەرزىمى ءوتىپ كەتكەن ايىپپۇلدارعا 25 پايىزدىق تولەم الىنبايتىن بولدى

ورتالىق كوممۋنيكاتسيالار قىزمەتىندە وتكەن بريفينگتە ادىلەت ۆيتسە-ءمينيسترى جەكە سوت ورىنداۋشىلارى جۇمىسىن روبوتتاندىراتىن جوبا قۇرىلاتىنىن ايتتى,-دەپ حابارلايدى Qandastar.kz

ادىلەت ۆيتسە-ءمينيسترى بەكبولات مولدابەكوۆ روبوت-جەكە سوت ورىنداۋشىسى جوباسى تۋرالى ايتتى. «بۇرىن مىسالى سىزگە «سەرگەك» كامەراسى بويىنشا ايىپپۇل سالىنسا جانە ونى 50 كۇن ىشىندە تولەپ ۇلگەرمەسەڭىز, ءسىزدىڭ ايىپپ ۇلىڭىز جەكە سوت ورىنداۋشىسىنا ءوتىپ كەتەتىن.

جەكە سوت ورىنداۋشىسى قىزمەتكەرى تىيىم سالىپ, سودان سوڭ ايىپپۇل سوماسىنىڭ 25 پايىزىنا دەيىن سىزدەن قارجى ءوندىرىپ الاتىن. ەندى, ەگەر ايىپپۇل 50 كۇننەن اسىپ كەتسە, ءبىز وعان Egov ارقىلى قوسىمشا SMS جانە push-حابارلاما جىبەرەمىز. قانداي دا ءبىر بانكتىڭ ءموبيلدى قوسىمشاسىن پايدالاناتىن بولسا, سوعان دا جىبەرەمىز. ازاماتتاردان ارتىق اقشا وندىرىلمەۋى ءۇشىن قولدان كەلگەننىڭ ءبارى جاسالىپ جاتىر. ەندى روبوت مۇنىڭ بارلىعىن تەگىن جاسايدى, ياعني بۇعان دەيىنگى 25 پايىز بولمايدى», – دەدى ادىلەت مينيسترلىگىنىڭ وكىلى.

ول مۇنداي روبوت ەسەبىنەن جىل سايىن 2,2 ميلليارد تەڭگە ۇنەمدەلەتىنىن ايتتى – بۇل بۇعان دەيىن قازاقستاندىقتاردان كەشىكتىرىلگەن ايىپپۇلدار ءۇشىن ءوندىرىپ الىنعان سوما.