جاڭالىقتار
قازاقستاندىقتاردىڭ 68,1 پايىزى مەملەكەت دۇرىس باعىتتا كەلە جاتىر دەپ ەسەپتەيدى
قازاقستان رەسپۋبليكاسىنىڭ پرەزيدەنتى جانىنداعى قازاقستاننىڭ ستراتەگيالىق زەرتتەۋلەر ينستيتۋتى اعىمداعى جىلدىڭ 11 مامىرى مەن 22 ماۋسىمى ارالىعىندا. الەۋمەتتانۋلىق ساۋالناما جۇرگىزدى,-دەپ حابارلايدى Qandastar.kz
ىرىكتەمە كولەمى 8000 رەسپوندەنتتى قۇرايدى. ساۋالناماعا 17 وبلىس پەن رەسپۋبليكالىق ماڭىزى بار قالالار: استانا, الماتى جانە شىمكەنتتىڭ 18 جاستان اسقان رەسپوندەنتتەرى قاتىستى.
زەرتتەۋگە سايكەس, قازاقستاندىقتاردىڭ الەۋمەتتىك-ەكونوميكالىق جاعدايى جاقسارۋعا بەيىم, مىسالى «ءسىزدىڭ وتباسىڭىزدىڭ ماتەريالدىق جاعدايى سوڭعى ءبىر جىلدا قالاي وزگەردى?» دەگەن سۇراققا رەسپوندەنتتەردىڭ ۇشتەن ءبىر بولىگى (31,1%) ءوزىنىڭ جانە ءوز وتباسىنىڭ قارجىلىق جاعدايى ءبىرشاما جاقساردى دەسە, ال ۇشتەن ءبىرى (31,6%) وزگەرگەن جوق, سول كۇيىندە قالدى دەپ جاۋاپ بەرگەن. رەسپوندەنتتەردىڭ 27,1%-ى ءوز ءال-اۋقاتىنىڭ ايقىن ءوسۋىن اتاپ ءوتتى. ال رەسپوندەنتتەردىڭ 8,6%-ى قارجىلىق جاعدايىن بەلگىلى ءبىر دارەجەدە ناشارلادى دەپ ەسەپتەيدى.
«ءسىزدىڭ ويىڭىزشا, سوڭعى جىلدا ءسىزدىڭ وتباسىڭىزدىڭ ماتەريالدىق جاعدايى قالاي وزگەردى?»
ەڭ تومەنگى جالاقىنىڭ 60 مىڭ تەڭگەدەن 70 مىڭ تەڭگەگە دەيىن ۇلعايۋى, دارىگەرلەردىڭ ورتاشا جالاقىسىنىڭ 30%-عا جانە ورتا بۋىن مەديتسينا قىزمەتكەرلەرىنىڭ جالاقىسىنىڭ 20%-عا ءوسۋى, زەينەتاقى مەن جاردەماقىلاردىڭ بارلىق كولەمىنىڭ 4,4 ميلليونعا ۇلعايۋى, جوعارعى وقۋ ورىندارى ستۋدەنتتەرىنىڭ, ماگيسترانتتارى مەن دوكتورانتتارىنىڭ شاكىرتاقىسىن كوتەرۋ, شاعىن نەسيەلەۋ تاسىلدەرىن وزگەرتۋ, كاسىپكەرلىكتى رەتتەۋدەگى جاڭا تاسىلدەر جانە مەملەكەت قابىلداعان باسقا دا شارالار قازاقستاندىقتاردىڭ ماتەريالدىق جاعدايىن جاقسارتىپ كەلەدى.
2023 جانە 2024 جىلدارى دەنساۋلىق ساقتاۋ مەن ءبىلىم بەرۋدى دامىتۋعا, تۇرعىن ءۇي قۇرىلىسى مەن جول جوندەۋگە مەملەكەتتىك شىعىستاردىڭ ۇلعايۋى ازاماتتاردىڭ بۇگىنگى ومىرىنە قاناعاتتانۋىنىڭ نەگىزى بولدى. بۇل قازاقستاندىقتار اراسىنداعى الەۋمەتتىك ءوپتيميزمنىڭ ايتارلىقتاي جوعارى دەڭگەيىن تۇسىندىرەدى. وسىلايشا, قوعامدىق پىكىرگە سايكەس, ازاماتتاردىڭ 68,3 پايىزى جارقىن بولاشاققا ۇمىتپەن قارايدى. بۇل كورسەتكىشكە ايتارلىقتاي جاقسارۋدى كۇتەتىن رەسپوندەنتتەردىڭ 37,6%-ى جانە ءومىر ءسۇرۋ جاعدايلارىنىڭ ءسال جاقسارۋىن كۇتەتىن 30,7%-ى كىرەدى. بۇل جاعدايدا قازاقستاندىقتاردىڭ مەنتاليتەتىنە سىلتەمە جاساۋ ادەتكە اينالعان, بىراق الەۋمەتتىك ءوپتيميزمنىڭ الەۋمەتتانۋلىق تۇسىندىرمەسى ەڭ الدىمەن ەل ازاماتتارىنىڭ ساپالى بىلىمگە, دەنساۋلىق ساقتاۋعا, بايلانىس پەن تۇرعىن ۇيگە قولجەتىمدىلىگىندە جاتىر.
«قالاي ويلايسىز, ءبىر جىلدان كەيىن ءسىز ء(سىزدىڭ وتباسىڭىز) قازىرگىگە قاراعاندا جاقسىراق ءومىر سۇرەسىز بە, الدە ناشارلاۋ ما?»
ەلدى جان-جاقتى جاڭعىرتۋدىڭ جوعارى قارقىنى ايتارلىقتاي قوعامدىق قولداۋعا يە – قوعامدىق پىكىر ساۋالناماسىنىڭ قورىتىندىسى بويىنشا قازاقستاندىقتاردىڭ 68,1%-ى ەل دۇرىس باعىتتا دامىپ كەلە جاتىر دەپ ەسەپتەيدى.
جالپى, قوعامدىق پىكىردى زەرتتەۋ ناتيجەلەرى حالىقتىڭ قارجىلىق جاعدايىنداعى وڭ وزگەرىستەردى جانە ەل ازاماتتارىنىڭ جوعارى الەۋمەتتىك ءوپتيميزمىن كورسەتەدى.
